Daghang aksidente sa Talisay itandi sa miaging tuig

CEBU, Philippines —  Taas ang kaso sa disgrasya sa kadalanan sa Dakbayan sa Talisay ang natala sa unang kwarter ning tuig matud pa ni Jonathan Tumulak, pangu sa City of Talisay-Traffic Operation Development Authority (CT-TODA).

Sigon pa ni Tumulak nga diha gyud sa Cebu South Coastal Road (CSCR) ang pinakadaghan og disgrasya.  Sa ilang ihap miabot sa 629 ang nadisgrasya sa unang kwarter mas taas kini sa miaging tuig nga mitala lang og 550.

Ang CT-TODA nakadawat og bag-ong motorsiklo gikan sa P5 Driving School nga gipakig-alayon sa City Advisory Council (CAC).

Matud pa ni Cyril Velasco, presidente sa CAC nga mao kini ang paagi nga sila makatabang sa mga enforcer nga paspas ang ilang pagresponde sa mga digrasya sa kadalanan o bisan unsa nila nga alarma.

Gihangop kini ni Tumulak tungod kay ang motorsiklo usa sa ilang transportasyon nga makaliot-liot sa mga suoton nga dapit.

Sa pikas bahin, usa ka 10- wheeler cargo truck nga nagkarga og mga kawayan paingon sa Isla sa Olango ang nahagbong sa Hilton Port sa Barangay Punta Engaño sa Siyudad sa Lapu-Lapu alas-7 pasado kagahapon sa buntag adlaw nga Biyernes.

Si Nagiel  Bañacia, pangulo sa Lapu-Lapu  City  Disaster Risk  Reduction and Management Office (LCDRRMO) miingon nga walay naangol sa maong insidente tungod kay ang truck boy ug ang tag-iya nga maoy driver nga si James Precillas nga taga Lungsod  sa Compostela dali man nga nakaambak

Si  Pricellas miingon nga padulong isakay sa roro ang trak apan sa pag-backing niini nalahos kini sa pantalan ug natagak sa dagat.— Romeo  T.  Limpangog, IBM (BANATNEWS)