Way biyahe sa barko nga gikanselar
CEBU, Philippines — Bisan sa dautang panahon dala sa super typhoon Betty, walay biyahe sa kadagatan nga gikanselar ang Philippine Coastguard Central Visayas. Si Lt. Niño Aniban, tigpamaba sa Philippine Coast Guard (PCG)-7 miingon nga wala pay mga biyahe sila nga gikanselar nunot sa hulga sa bagyo kagahapon apan kini mipahimangno nga bisan unsang orasa mahimo nila kining buhaton depende kinisa weather bulletin nga ipagawas sa PAGASA.
Dugang ni Aniban magsugod sila sa pagkanselar sa mga biyahe kung dunay gale warning o kusog nga hapos sa hangin nga makamugna og dagkong bawod sa kadagatan ug peligro sa mga molawig niini.
Sukad niadtong adlaw’ng Miyerkules gimanduan na hinuon nila ilang mga units sa nagkalain-laing dapit sa Central Visayas apil ang Negros Oriental, Bohol, Camotes ug Siquijor nga andamon ang quick response team ug assets.
Naa sab sila’y duha ka Coast Guard vessels nga naka-standby kun pananglitan dunay mahitabong search and rescue.
“Naa karon diri sa Cebu Port ang si BRP Capones 44-meters nato ug si BRP Malamawi ang 24 meters nato sa coast guard,” sigon ni Aniban.
Giawhag ni Aniban ang mga pasahero nga kanunay mag-monitor sa biyahe sa barko ilabi na diha sa social media sanglit nagpahibawo gyud dayon sila kung dunay suspension sa biyahe.
“Ang advise lang namo sa passengers keep updated lang sa social media especially sa coast guard kay mag post ra man mi og mga cancellation of trips, suspension of trips, we can also visit yung website sa PAGASA kay kana sila magdepende man pud mi sa ilaha kay once mag release ang PAGASA og mga warning especially gale warning depende sa lugar din automatically we’ll suspend or cancel yung trips,” matud ni Aniban.— IBM (BANATNEWS)
- Latest