CEBU, Philippines — Nakadawat og pinansiyal nga ayuda gikan sa kagamhanan sa dakbayan sa Mandaue ang mga Mandauehanon nga topnotcher sa board exam sa tagsa-tagsa nila ka propisyon.
Personal nga gitunol ni Mayor Jonas Cortes ang cash incentive nga gisaksihan usab sa uban pa nga mga opisyal sa kagamhanan sa maong dakbayan.
Suma pa ni mayor Cortes nga ang paghatag og incentives sa mga topnotcher maoy agig pagpahalipay sa kalampusan nga ilang naangkon ingon man pagdasig sa mga Mandauehanon nga maningkamot sa ilang pagtungha.
Ang nakadawat sa maong pinansiyal nga ayuda mao sila si Angelica Sanchez sa Barangay Casuntingan nga nahimong Top 3 sa Occupational Therapist Licensure Examination nga gipahigayon niadtong Disyembre 2022. Si Sanchez tinun-an sa Cebu Doctors University, Kathleen Ry Mina nga taga Barangay Looc, Top 4 sa Nurses Licensure Examination niadtong Nobiyembre 2022 ug tinun-an usab sa Cebu Normal University.
Samtang P10 mil ang nadawat nga cash incentive sa taga Barangay Cubacub nga si Ellaine Esmero nga nahimutang sa Top 8 sa Nurses Licensure Examination nga tinun-an sa Cebu Normal University.
Laing nakadawat og P10 mil pesos nga cash incentive mao si Adielyn Caitor nga taga Barangay Subangdaku ug Top 10 sa Licensure Examination for Teachers niadtong October 2022 nga tinun-an usab sa Cebu Normal University. (BANATNEWS)