CEBU, Philippines — Giklaro sa Metro Cebu Water District (MCWD) nga dili pa matawag nga "alarming " ang kasamtang istado sa produksyon sa tubig sa Sugbo apan giawhag ang katawhan nga padayon nga magdaginot sa pagamit sa tubig.
Gitataw sa tigpamaba sa MCWD nga si Minerva Gerodias nga base sa ilang rekord wala gyud nahitabo nga nahubsan ang pundo nila sa Buhisan dam.
Ang labing minos nga pag-ubos sa production sa tubig sa maong area natala sa ting-init niadtong 2017 diin naa kini sa 2,500 cubic meters.
Ang normal nga production sa tubig sa Buhisan naa sa 5,000 cubic meters matag adlaw.
Sa pagsikad sa ting-init sulod na sa pipila ka adlaw, nasigpatan lang ang gamay nga pagkibra ug naa na kini sa 3,500 cubic meters, hinuon gitataw ni Gerodias nga dili angayan maalarma ang katawhan.
Dugang pa ni Gerodias nga naka-stanby usab kanunay ang ilang siyam ka dagkong trucks nga magkarga og tubig ngadto sa mga area nga makasinati og hinay o walay agas.
Una nga nigawas ang report nga diha usab sa pasilidad sa Jaclupan, dunay pu'y "slight" o gamay nga pag-ubos sa produksyon sa tubig ug nakabaton na kini og 25,000 cubic meters gikan sa 30,000 cubic meters sa normal nga panahon.
Gipasalig sa MCWD ngadto sa katawhan nga duna ra'y igong supply ilabi na nga nagikan kini sa ilang ground water sources.
Una na nga gideklarar sa Cebu City Disaster Risk Reduction and Management Office (CCDRRMO) nga naa na karon ang siyudad sa Sugbo sa “state of preparedness” diin adunay tulo ka water tankers sa siyudad ang gipatuyok sa kabaranggayan. (BANATNEWS)