CEBU, Philippines — Human sa lapad nga mga pakisusi wala makombinser o gisalikway sa Cebu City Traffic Management Coordination Committee (TMC) ang pangangkon sa contractor sa kasamtangang Digitalized Traffic Light System Project sa siyudad nga giingon mao kini ang "most advanced traffic system" sa kalibutan.
Nabatyagan usab sa TMC Board nga gipangulohan ni Atty. Rico Rey Francis "Koko" Holganza nga pipila ka units sa traffic lights ang aduna na'y deperensiya sulod na sa pipila ka buwan.
Ang traffic board members nakabantay usab nga adunay mga intersection nga makapalibog ang traffic lights tungod kay magdungan og siga ang red ug green.
Nihimo ang TMC board og pormal nga pagpadayag sa findings pinaagi pag-umol og resolusyon.
Nasayran nga niabot ngadto sa P480 million ang kantidad sa maong proyekto.
"The introduction of timers while may be helpful to warn motorists on the time left before the light changes, does not help much especially during peak hours where a more adaptive traffic light system is needed", tipik sa maong resolusyon.
Gitataw sa TMC Board nga ang gisudlan nga traffic light system sa siyudad dili maayo gumikan sa kwestiyonableng kalidad niini nga wala naka-deliver og dakong impact sa sitwasyon sa trapiko sa siyudad.
Ang maong traffic lights unang gilusad niadtong Marso 2021 panahon kini ni kanhi mayor Edgardo Labella. (BANATNEWS)