P376.6 milyones nahatag nga hinabang sa probinsiya sa LGUs

CEBU, Philippines — Nikabat ngadto sa P376.6 milyones nga pinansiyal nga hinabang ang naapod-apod sa Probinsiya sa Sugbo ngadto sa 50 ka lungsod ug siyudad sa probinsiya.

Ang maong pundo alang kini sa nagkadaiyang proyektong imprastraktura sa kalungsoran nga gi-identify sa mga mayor, bise mayor, konsehal ug mga opisyal sa barangay.

Base sa taho sa Capitol Information Office nga nikabat ngadto sa P41.6 milyones ang nahatag sa mga LGU sa first district; P53.4 milyones sa second district; P45.2 milyones sa third district; P65.8 milyones sa fourth district apil na ang mga LGU sa Bantayan island; P100 milyones sa fifth district apil na ang Isla sa Camotes; P21.2 milyones sa Mandaue City ug P49.4 milyones sa 7th district.

Ang maong financial assistance gitunol ni Gobernador Gwendolyn Garcia ngadto sa mga opisyal sa lungsod atol sa sunod-sunod nga Caravan of Cebu Provincial Government Services sa unang quarter sa tuig 2023. (BANATNEWS)