Sugbo Bike Lanes Patrol makaisyu na og citation ticket

CEBU, Philippines — Makaisyu na og citation tickets sugod karong adlawa ang Sugbo Bike Lanes Patrol  alang sa violators sa  lagda sa trapiko.

Base sa taho sa Sugbo Bike Lanes nga usa na sila sa mga kaabag Cebu City Transportation Office sa pagsumpo sa mga badlongon diha sa kadalanan.

Ang pini nga bike patrol mahimong makaisyu og citation ngadto sa mga drayber sa truck, private/public nga mga saknayan, motorsiklo, tricycle, e-bike ug mga bisekleta.

Usa usab ang SLB sa aktibo kaayo nga nalambigit sa operasyon nga gitawag og “Oplan Ratsada sa Kalsada, Padayon ang Disiplina” nga dungan sa hingpit nga implementasyon sa City Ordinance 2408, Section 8 kun “Obstruction to the Bike Lanes”.

Ang maong mga sakyanan nga gibiyaan ug gipasagdan lang diha sa karsada sitahon nila kini.

Giingong tungod sa mga butang nga nagbabag sa mga agianan mapugos ang ubang tawo nga moagi diha sa karsada nga alang sa mga sakyanan diin maghatag na kini og problema sa dagan sa trapiko.

Dili lang kini ang unang higayon nga ni-deputized ang CCTO sa pipila ka department o division sa city hall diin nabuhat na kini sukad pa kaniadto.

Usa na niini mao ang  Market Operations Division (MOD) aron makapanakop kini og traffic violators  diha sa  palibot sa merkado.

Tumong niini nga dili makapatuyang sa ilang taras ang mga badlongong motorista nga moagi sa mga dalan nga nasulod sa hurisdiksyon sa Carbon Market gumikan kay madakpan gyud kini kon makahimo og traffic violations.

Gihangyo ang mga motorista nga moagi sa merkado nga motuman sa mga lagda aron mahimong hapsay ang area ug  tulin usab ang pagpangompra sa mga tawo ug a adto kini mo-park sa gitagana nga lugar. (BANATNEWS)