Bodegero’g shabu nadakpan

CEBU, Philippines — Usa ka gipasanginlang notadong tigpayuhot og ilegal nga drugas ang nadakpan sa mga sakop sa Drug Enforcement Unit sa Talisay Police Station kagahapon sa buntag adlaw nga Domingo.

Ang operasyon gipangulohan ni Police Lieutenant Colonel Randy T. Caballes nga niresulta sa pagkasakmit sa mga dagkong putos sa gituohang shabu atol sa buybust operation diha sa Saint Rafael Brgy. Biasong Siyudad sa Talisay.

Giila ang dinakpan nga si Lito Tagasling Canillas alays “Tolits”26 kasamtangan nagpuyo sa nahisgutang dapit.

Matud pa ni   Caballes nga si Canillas gikonsiderar nga High Value Individual Regional Level Drug Watchlist.

Dugang pa ni Caballes nga lumad na taga Pasig City si Canillas ug naabot kini sa Talisay niadtong 2015 kay nagtrabaho isip laborer.

Apan si Canillas miinsister nga igo lang siya gisugo aron ihatud ang drugas og suhulan siya og 3,000 pesos matag hatud niya niini.

Matud pa niiya ikatulo pa niya kini ka higayon nakahatud sukad nga siya nisuway pagsud ning trabahoa ni adtong miaging tuig sa bulan sa Disyembre.

Matud pa ni Caballes nga duha ka semana nilang namonitor ang kalihokan ni Canillas ug mao kini ang bodegero sa usa ka durugista nga nailhhan sa ngalan nga “Boss” nga anaa nabilango sa Cebu City Jail.

Atol sa operation nakuha sa otoridad ang upat ka dagkong putos nga tag 100 grams ug usa gamay nga paketeng gituohang shabu nga motimbang og 400 gramos.

Mobalor kini og P2,720,000.00 sa street value.

Ang dinakpan pasakaan og kasong kalapasan sa RA 9165 Comprehensive Dangerous Drug Act of 2002. (BANATNEWS)