Korean Coastguard team motabang pagkontrol sa oil spill

CEBU, Philippines —  Dunay moabot nga grupo sa Korean Coast Guard dinhi sa nasud aron motabang sa paningkamot sa gobiyerno sa Pilipinas nga masanta ang pagkatag sa oil spill gikan sa nalunod nga tanker sa kadagatan sa Naujan, Oriental Mindoro.

Sa samang higayon, ang Amerika mipahibalo nga mohatag kini og dugang P10-milyones nga tabang alang sa oil spill management and environmental assessment sa maong problema.

Ang MT Princess Empress nagdala og 800 mil ka litrong lana dihang kini nalunod sa maong kadagatan u gang niawas nga lana nikatap na sa kadagatan palibot sa Mindoro ug sa mga silingang mga probinsiya apil na didto sa Palawan.

Tungod niini, kaliboang mga nanginabuhi sa dagat pinaagi sa pangisda ang nawad-an og panginabuhian ug nangaguba sab ang mga bakhawan sa kabayboyanan.

“On Monday, the South Korean experts will arrive at the headquarters of the Philippine Coast Guard (PCG),” matud pang Rear Admiral Armand Balilo, ang tigpamaba sa PCG.

“They will make an evaluation and, hopefully, they could also offer a final solution and an ROV (remotely operated vehicle) to end this problem,” puno pa ni Balilo.

Gipahibalo sab sa PCG nga ang gobiyerno sa South Korea misaad nga mohatag sab og mga oil spill response equipment, apil na niini ang 20 toneladang sorbet pads ug snares, 1,000 meters nga solid flotation curtain boom ug 2,000 sets nga personal protective equipment.

Matud pang Balilo naa na sila karon sa second level sa oil spill response operations, kini mao ang pagtapak sa 23 ka mga buslot sa maong tanker diin nanggawas ang lana gamit ang laing ROV.

Ang unang ROV nga gikan sa Japan maoy nitabang sa pagpangita sa maong tanker sa ilawom sa dagat, apan wala kini kapabilidad pagtapak sa buslot.

Ang National Disaster Risk Reduction and Management Council nangita karon og alternatibong paagi, samtang ang PCG nakigalayon na sa US Coast Guard kun duna silay ROV nga makahimo niini.

“Just be rest assured that we’re doing everything. We’re doing a collaboration with other agencies. We are asking help from other countries,” matud pang Balilo. Ang gobiyerno sa Amerika aktibong nitabang sa PCG pagpakgang pagkatap sa oil spill. Gani aduna nay mga US experts sa US Coast Guard ug sa US National Oceanographic and Atmospheric Administration ang niabot sa Oriental Mindoro sayo ning semanaha aron sa pag-assess sa apektadong lugar. (BANAT NEWS)