E-bike drayber gipusil patay sa Talisay

CEBU, Philippines —  Lain na sang e-bike driver ang gipusil patay sa wa pa mailhing mamumuno diha sa Sitio Atisan, Barangay Cansojong, Syudad sa Talisay kagahapon sa kaadlawon.

Ang biktima mao si Rodolfo Apolinario Jr., alyas Lolot, 33,  taga V.H Garces St., Barangay Cansojong sa nahisgutang siyudad.

Sa inisyal nga imbestigasyon sa kapolisan nasuta pinaagi sa igsuon sa biktima nga sa wa pa mahitabo ang pagpamusil nakakita pa siya niini  nga nakig estorya sa usa ka lalaki nga nagsul-ob og baseball cap nga taas og buhok nga kulot ug nagsul-ob og puti nga t-shirt.

Pipila ka minutos ang nilabay diha na dayon sila nakadungog sa taho nga gipusil ang iyang igsuon.

Ang inahan sab sa biktima nga si Novenda Apolinario nitug-an sa otoridad nga ang iyang anak suod nga higala sa ginganlan og “bayot” nga sa iyang pagtuo may kalambigitan sa pagtipi sa iyang anak.

Ang biktima gisuwayan sa pagtabang sa mga sakop sa Talisay Rescue Emergency Action Team (TREAT) apan nakabsan gyud kini sa kinabuhi gumikan sa iyang samad pinusilan diha sa iyang ulo.