Poultry program sa Talisay City milambo

CEBU, Philippines —  Midaghan na ang binuhing manok sa Dakbayan sa Talisay nga giamoma sa taga City Agriculture diha sa compound sa Talisay City Hall.

Una niini, gisugdan nila ni Bernardo Quijano, city agriculturist sa Syudad ang pag-ugmad sa vegetable garden. Karon ila nasab nga gipalambo ang gidaghanon sa ilang mga manok.

Matud pa ni Quijano nga usa ka tangkal sila nagsugod sa pagbuhi sa manok pero karon dul-an na kini ka napulo ka tangkal nga misulod og sobra 300 ka manok.

Asoy pa niya nga ila kining gihinay-hinay  og hatag sa mga purok sa kada barangay aron sila nasab ang magpadaghan niini.

Si Quijano nitataw nga dili itlog ang ilang gihatag kundi manok na gyud aron sila na mismo ang mopadaghan ug mao nasab ang mohatag ngadto sa mga kabalayan o sa ilang mga sakop sa purok.

Nagtinguha sila si Quijano nga seryusohon kini sa tanan ang pagtanum og utanon ug pagbuhi og hayopan kay kini magamit raman gyud sa pagkaon o ba kaha sa panginabuhian.—Gabriel Bonjoc/IBM

Mga boarding house lakip nga bantayan atol sa Semana Santa

Dili lang ang religious activities subay sa kasaulogan sa Semana Santa ang gibantayan sa Cebu City Police Office (CCPO) lakip nga gibantayan ang boarding houses, mga bangko ug uban pa.

Matud ni Police Lieutenant Colonel Ma. Theresa Macatangay, tigpamaba sa CCPO nga niumol sila og security plan lakip niini ang pagtubag kon adunay motumaw nga mga insidente.

Ang mga trabahante ingon man ang mga tinun-an mouli sa ilang tagsa-tagsa ka probinsiya aron adto magsaulog sa Semana Santa mamingaw ang boarding houses ug mga bangko ug gipanglantawan nila nga mopahimulos  sa higayon ang mga oportunista hinungdan nga nihimo sila og mga lakang aron malikayan ang robbery incidents ug uban pang krimen.

Ang CCPO nakig-alayon sa mga barangay kapitan ingon man sa mga manager sa bangko aron ma-assess ang mga lugar nga kinahanglang adtoan ug mapatrolyahan  sa mga polis.

Kagahapon sa buntag adunay coordination meeting ang CCPO ug mga chief of police sa 11 ka police stations sa siyudad ingon man mga special units aron mahibaw-an ang deployment sa mga PNP personnel sa  mga dapit nga kinahanglana adunay dugang force multipliers ug ma-identify ang mga lugar nga kinahanglan tutokan panahon sa Semana Santa.

Ang station commanders nakig-alayon na sa mga nangulo sa nagkalain-laing parokya aron aduna sila’y systematic deployment sa mga tawo ug magkauyon usab ang ilang schedule. (BANAT NEWS)