Mga nagpuyo sud Doña Pepang Cemetery papahawaon na

CEBU, Philippines — Gihatagan og napulo ka adlaw ang mga nanag-iya og mga estraktura ug namuyo sa sulod sa Doña Pepang Cemetery sa Barangay Carreta sa Dakbayan sa Sugbo.

Ang Prevention Restoration Orderly Beautification Enhancement Team ang nihatag na ug 10-days notice to vacate sa maong lugar. Ang notisya nagsugod niadtong Marso 22 ug gipaabot kini nga matapos sa Abril 4, 2023 kini base sa social media post ni Ramil Ayuman, assistant secretary ni Mayor Michael Rama on special projects.

Matud pa adunay gibanabanang dili mominos 30 ka estraktura ang naa sa sud sa maong sam-ang. Ang uban niini, gihimong pinuy-anan sa pipila ka pamilya.

Kung mahinumduman ang dul-an sa usa ka ektaryang luna himuon kini nga heritage park sa mayor ug gihatagan lang kutob sa Hunyo 12, 2023 ang Task Force Pepang sa paghuman niini. —/IBM (BANAT NEWS)