Usa ka seaman lakip sa nasikop sa buy-bust operation

CEBU, Philippines — Usa ka seaman ang nalakip sa pagkasikop sa 5 ka drug suspect atol sa buy-bust operation nga gipahigayon sa PDEA RO 7 diha sa sitio Ibabao, Barangay Mambaling, dakbayan sa Sugbo kagahapon sa hapon.

Ang mga suspek giila nga sila si Johnrey Carlon Salaritan alyas Kulot 38, Marcy Grace Teologo Creus 34, Rico Panares Lapastora 40, usa ka seaman nga residente sa Barangay Pandacan, lungsod sa Pinamungajan, Cebu, Geraldo Vaplor Avendula 57 ug Susana Labyana Maribao 42.

Si Lapastora giingong usa ka 3rd mate sa barko nga usa ka inter island og mikanaug sa barko aron mosuyop og shabu. Nakuha sa mga otoridad ang lima ka pakete sa gituhuang shabu nga mitimbang og 13 grams nga gibana bana nga mobalor og 88,400. 00.

Samtang sikop ang mag live-in partner human sa buy-bust operation sa hiniusang pwersa sa Labangon Police Station ug PDEA 7 diha sa may Happy Valley St, Barangay Labangon, ning Dakbayan sa Sugbo niadtong miaging gabii.

Ang nasikop naila nga si Efren Pedoche, 38 anyos, ulitawo, residente sa sitio Lawis Alaska, Barangay Mambaling ug Emelyn Morga, 37anyos, taga Sitio Langub, Barangay Kalunasan.

Nasakmit gikan kanila ang ginadili nga drugas nga gibana-bana nga motimbang og 60 gramos nga mobalor ug P408 mil ug buy-bust money. Ang kapolisan nakadawat ug impormasyon kabahin sa pagpayuhot ug ginadiling drugas sa mga suspek hinungdan nga gihimo nila ang surveillance. —Rowena D. Capistrano/MEL (BANAT NEWS)