Sitwasyon sa CCTV sa Cebu City ipa-update

CEBU, Philippines — Ang Konseho sa Siyudad sa Sugbo nipalabang og resolusyon nga nag-awhag sa

Cebu City Transport Office (CCTO), Management Information and Computer Services (MICS) ug ubang hingtungdan nga buhatan sa kagamhanan sa siyudad sa pagtaho ug pag-update kanila sa kasamtangang sitwasyon sa Closed Circuit Television (CCTV) cameras.

Si Konsehal Jaypee Labella maoy nangamahan sa resolusyon nga nagtinguha sa pagsiguro sa kaluwasan ug seguridad sa siyudad.

"This initial step will enable us to implement disaster quick response measures, and promote peace and order in our city. Thank you to my esteemed colleagues in the council for their unwavering support", tipik sa social media post ni Labella.

Base sa maong resolusyon nahisgotan nga adunay ubang CCTV systems sa siyudad nga gikatahong adunay deperensiya diin nakahatag kini og kompormiso sa seguridad ug kaluwasan sa mga tawo. Pinaagi sa CCTV mailhan dayon ang mga inbidwal nga maoy responsable sa nahitabong krimen diha sa kadalanan.

Nasayran nga adunay mga kaso sa pagpanglabni o pagpangawat ug dako kaayo og tabang ang CCTV sa pag-ila sa mga kriminal.

Ubos sa Section 16 sa Akta Republika 7160 kun “Local Government Code of 1991” naglatid nga ang matag local unit sa gobiyerno kinahanglang mogamit sa mga gahom alang sa kaayohan sa tanan.

Base usab sa Section 458 sa susamang balaod nagtugot kini Sangguniang Panlungsod nga mogama og mga ordinansa, resolusyon, pagahin og pundo alang sa general welfare.  —/BDB (BANAT NEWS)