Takas sa Talisay himuong simple; Doña Pepang Cemetery ugmaron karong tuiga

CEBU, Philippines — Simple lang nga saulogon sa Dakbayan sa Talisay ang ika-79th nga Takas sa Talisay karong Marso 26 niining tuiga.

Kini maoy gibutyag ni Mikki Aznar, pangulo sa City Tourism Office.

Matud ni Aznar nga ilaha lang isiguro sa selebrasyon mao ang maayong relasyon sa tulo ka nasud sa Japan, Estados Unidos ug sa Pilipinas.

Anaa gihapon sila’y mga representante nga gipang-imbitar gikan sa duha ka nasud.

Sugdan ang kalihokan sa Santos nga Misa ug isunod dayon ang parada sa mga sakyanan sa gobiyerno.

Atol usab sa maong kasaulogan ipahigayon ang flag raising sa tulo ka bandera sa nahisgutang mga nasud, wreath laying ug 21 gun salute alang sa paghandum sa mga tawo nga nibuhis sa ilang kinabuhi sa nilabay’ng 79 ka tuig.

Si Aznar nagkanayon nga wala na ang re-enactment sa gubat tungod kay simple lang ang ilang kalihokan.

Sa pagkahapon sa maong adlaw mao ang championship sa beach volley ug inig kagabii adunay ipahigayon nga concert diha sa baybayon sa Barangay Poblacion.

Sa laing bahin, gilaomang matigayon na sa tunga-tungang bahin karong tuiga ang gitinguha sa kagamhanan sa Siyudad sa Sugbo nga himuong heritage park ang  Doña Pepang Cemetery diha sa Barangay Carreta.

Si Ramil Ayuman, special assistant on special projects ni Mayor Michael Rama nagkanayon nga giaprobahan na sa mayor ang desinyo niini.

Usa sa mga kamandoan sa mayor nga kinahanglang mahuman na kini karong Hunyo 12, 2023.

Matud ni Ayuman nga ang maong proyekto maghatag og dugang atraksiyon sa siyudad.

Giingong adunay sentimental value ang maong dapit ilabi na nga diha gipanglubong ang pipila ka mga kabanay sa Osmeña, Rama, Sotto, Briones ug uban pa.

Ang pag-convert sa Doña Pepang o Osmeña Mausoleum ngadto sa heritage park kabahin kini sa plano sa Siyudad sa Sugbo nga masusama kini sa Singapore. Sanden J. Anadia (BANATNEWS)