Asawa gipatay sa bana kay dunay laing ka text
CEBU, Philippines — Gipusil patay sa usa ka bana ang iyang asawa tungod nagselos kini kay dunay nakasulti nga duna kini ka text nga laing lalaki hinungdan sa ilang panaglalis ug napusilan kini diha sa mismong gamay nga tindahan sa biktima diha sa Purok Talisay Brgy. Poblacion sa Lungsod sa Compostela kagahapon sa buntag.
Ang biktima giila sa kapolisan mao si Evelyn Suarez Toledo, 45, samtang ang suspetsado mao iyang bana nga si Sidney Bacalla Toledo, 40.
Matud pa ni Police Staff Sgt. Daryl Rondina, sa Compostela Police Station nidangop kanila ang ginang niadtong Biyernes kay naglalis sa iyang bana nga namasangil nga duna siyay laing karelasyon.
Gikatahong wa mouli ang suspek sa ilang balay ug kagahapong adlawa nibutho kini sa tindahan sa biktima ug naglalis na pud silang duha hangtud nga naglinayogay.
Matud pa natumba ang ginang ug dihadiha kini gipusil sa suspek sa walang bahin sa dughan niini.
Dali nga misibat ang suspek dala ang gamay nga bag sa biktima samtang ang naulahi gitabang ug gidala sa tambalanan apan nakabsan kini sa kinabuhi samtang gitabang.
“As per as information namo is nagselos ang bana sa iyang asawa naa kunoy lain pero wala tay concrete evidence nga naay lain. That is the allegation from the children of the victim and the family of the suspect. Nasakpan kuno nga naay ka text2 ug tawag2 mao nay gisulti,”sigon ni Rondina.
Padayon pang gipangita ang suspetsado.— Rowena Capistrano, IBM (BANATNEWS)
- Latest
