ASF naa na sa Cebu City ug upat ka lugar sa Sugbo

CEBU, Philippines —  Gawas sa siyudad sa Carcar, aduna na pud na-detect nga African Swine Fever (ASF) sa lima ka dapit  sa Sugbo apil na ang Dakbayan sa Sugbo sumala pa sa Bureau of Animal Industry (BAI) sa Department of Agriculture (DA).

Kining bag-o na-detect diha sa  Cebu City, Bogo City, mga Lungsod sa  Sibonga, Liloan, ug Tuburan.

 Sa post sa BAI sa ilang social media page kagahapong adlawa, ang samples nakuha sa mga baboy gikan sa backyard farms sa maong mga lokalidad. “Samples were then submitted to the Regional Animal Disease Diagnostic and Reference Laboratory (RADDL) Region VII and tested using Real Time Polymerase Chain Reaction (RT-PCR), the gold standard for testing and confirming the ASF virus,” matud sa BAI.

Ang BAI nisaad sa mga stakeholders nga ilang gihimo ang tanan aron dili na mokatap ang makamatay nga sakit sa baboy.

“All the protocols which are being implemented by the BAI are evidenced based actions and proven to be the best option for us as of date while there is still no approved vaccine,” sumala sa maong ahensya.

“We understand that the affected farmers are sacrificing their livelihood and we appreciate their selflessness to follow the protocols in place.  This sacrifice does not go in vain as we work diligently and work hand in hand with you, our stakeholders, in protecting the hog industry,” dugang sa BAI. Nahitabo kini duha ka semana human nga ang DA nikompirmar nga adunay ASF nga na-detect sa siyudad sa Carcar.

Si Gobernador Gwendolyn Garcia una ng nibarog sa iyang posisyon nga dili dayon ipapatay ang mga gidudahang natakdan nga baboy, ipasiguro una kun ASF ba kini o ubang sakit sama sa classical swine fever o hog cholera pinaagi sa dugang test.

Sa polisiya sa DA, ang mga baboy nga naa sulod sa 500-meter radius gikan sa ASF infected area patyon dayun aron di makatakod sa laing baboyan.

Nimando pud si Garcia nga walay testing nga mahitabo sa baboy gawas kun nagpakita kini og sintomas sa ASF o hog cholera.

Ang BAI miinsister nga tanan nilang gibuhat dunay koordinasyon sa mga local government units ug hograisers nga nagtinguhang mapakgang ang pagkatap sa ASF sa ilang dapit.

“The responsibility lies not only among the implementers but also among the hog farmers, consumers, travelers, traders and the public who are the most affected in the pandemic that is ASF,” matud sa BAI.

Ang Provincial Legal Officer nga si Donato Villa Jr. nagkanayon nga ipadayon sa Probinsya ang  plano niini paghimo og kaugalingong protocol hilabina nga ang protocol nga gipatuman sa BAI “unrealistic” ug wala moagi sa konsultasyon sa mga LGUs ug sa Probinsya sa Sugbo subay unta sa Section 2(c),  Section 25(b), Section 27 sa Local Government Code.

Sa pikas bahin, si Mayor Patrick Barcenas sa Dakbayan sa Carcar mipahibalo nga hatagan og ayuda sa siyudad ang mga tag-iya og baboy nga naapil sa pag culling sa Barangay Can-asujan tungod sa ASF.

Giandam na sa konseho ang mga dokumento aron mapagawas ang pundo para kanila sumala pang Barcenas.  Samtang gihangyo niya ang mga opisyales sa siyudad nga di maghimo og estorya nga maoy makapalibog o pagdaut sa iyang administrasyon.—  Gabriel Bonjoc, IBM (FREEMAN)