300 ka tinun-an sa dakbayan sa Carcar nakadawat og tabang pinansyal
CEBU, Philippines — Miabot sa 300 ka tinun-an nga kabus ang nakadawat sa ilang pinansyal nga ayuda gikan sa kagamhanan sa Dakbayan sa Carcar.
Ang programa gihimo ubos sa pagdumala ni mayor Patrick Barcenas aron ang kabus nga tinun-an makapadayon sa ilang pagtungha sa kolehiyo.
Ang 200 ka tinun-an nakadawat og tag P20mil pesos alang kini sa usa ka semester.
Ang uban kanila natingob ang pagdawat sa tag P40mil ka pesos kay wala man sila mahatagi sa milabay nga semester.
Samtang mokabat usab sa 100 ka tinun-an ang benepisyaryo sa “Tulong Dunong Program” nga nakadawat og P7,500 ka pesos.
Matud pa ni Barcenas nga magpadayon ang programa aron mas daghan nga tinun-an nga kabus ang makahuman sa pagtungha ug mao nasab ang magmalampuson sa ilang kinabuhi.
Dili na babag ang kakabus alang sa pagpalambo sa kinabuhi sa usa ka tawo.
Dugang pa sa mayor nga mipasalig ang gobernadora sa Probinsya sa Sugbo, Gwendolyn Garcia nga mopatukod kini og unom ka lawak saringan sa Carcar City College. — /MEL (BANAT NEWS)
- Latest
