Saulog sa Tagbilaran 2023 gipaabot nga mabulokon
CEBU, Philippines — Gipaabot ang bongga ug mabulokon nga Saulog sa Tagbilaran 2023 subay sa kapistahan sa patron nga si St. Joseph the Worker Parish, sa Tagbilaran City Bohol.
Kini nonot sa kapin sa usa ka buwan nga pagpangandam sa selebrasyon sa mga kalihukan nga gibuksan pinaagi sa 458th Blood Compact Commemoration Program ug Saulog sa Tagbilaran 2023 Launching niadtong Marso 16, 2023.
Matud pa ni Tagbilaran City Mayor Jane Yap nga karong tuiga ang ilang Saulog Tagbilaran Festival magselebrar sa ika napulo ka tuig nga adunay daghan nga mga kalihukan sama sa Tagbo sa Tagbi, Mutya sa Tagbilaran, Saulog Festival King and Queen, Saulog Fluvial Parade ug Saulog Street Dancing Competition nga tapuson sa Mayo Saulog Concert.
Malaumon ang mayor nga ning pagbalik sa linawas nga mga kalihukan sa Saulog human sa duha ka tuig kapin nga pagka undang gumikan sa COVID-19 makadapit kini og daghang kaayohan sa natad sa negosyo.
Gitug-an sa Mayor nga dili mominos sa 15 ka mga contingent gikan sa lain-laing barangay sa Tagbilaran ang moapil sa Saulog Street Dancing Competition diin matag barangay makadawat ug P400mil ka pesos nga subsidy.
Si Yap, nipadayag nga sa pagkakaron wala pa silay nadawat nga mga guest contingent apan kun dunay nagtinguha bukas sila alang niini apan dili na kini apil sa contest.
Ang mayor niawhag sa tanan nga mga bol-anon ug mga dumudoong nga moapil ug makigsadya sa ilang Saulog sa Tagbilaran 2023. — /MEL (BANAT NEWS)
- Latest
