CESU sa Talisay gitinguha nga umolon

CEBU, Philippines — Tinguha sa Dakbayan sa Talisay ang pag umol og City Epidemiology and Surveillance Unit (CESU) aron dali nalang mamonitor ang nagkadaiyang sakit nga motumaw.

Si bise mayor Richard Francis “Choy” Aznar niduso sa unang pagbasa sa ordinansa labot sa pag umol sa CESU sa Talisay.

Matud pa ni Aznar nga usa kini siya ka paagi nga makolekta nila ang impormasyon gikan sa mga tambalanan, probinsya, barangay aron matakdo sa ilang listahan.

Nagkanayon ang bise mayor nga pinaagi sa pag-umol sa CESU mapadali nila ang pagmonitor sa bisan unsa nga matang sa sakit nga moigo sa katawhan.

Gusto ni Aznar nga adunay senemana nga koleksyon sa impormasyon aron mahatagan sab dayon nila og aksyon aron kapugngan nga mokatap ang sakit.

Lakip sa gibantayan mao ang Hand, Foot and Mouth Disease nga gikatahu nga nia karon sa siyudad sa Sugbo.

Subay niini si Aznar nanawagan sa katawhan nga di gyud kalimtan ang pagpanglimpyo ilabi na sa kalawasan aron dili dali nga matakboyan sa sakit. — /MEL (BANAT NEWS)