Simulation exercise gihimo sa mga malls sa siyudad sa Sugbo

CEBU, Philippines — Nagpahigayon og simulation exercise sa mga malls sa siyudad sa Sugbo ang Cebu City Fire Station kagahapong adlawa.

Usa kini sa nakalinya nga mga kalihukan subay na sa pag-obserbar sa Fire Prevention Month sa buwan sa Marso.

Gihulagway ni Senior Fire Officer 2 Wendell Villanueva, tigpamaba sa Cebu City Fire Station nga dako og tabang ang simulation exercise nga gihimo aron masayod unsay buhaton kun dunay sunog nga moigo sa usa ka dakong mall.

Gawas niini, gipakita sab sa Cebu City Fire Station kun unsa ka andam ang kabomberohan sa rescue ug firefighting operations.

Segun sa impormasyon nga gihatag ni SFO2 Villanueva gikan sa Marso 1 hangtud karong adlawa nakaresponde sila og 15 ka sunog ug dili momenus sa P11 million ang danyos niini.

Sagad sa naigo sa sunog mga panimalay ug duna say commercial establishments ug duha ka sakyanan.

Samtang gitudloan sa kabomberohan sa Dakbayan sa Talisay ang kabataan kung unsaon paglikay sa sunog.

Tipik kini sa programa atol sa kasaulogan sa fire prevention month.

Si SFO4 Guiller Pegarido nibutyag nga sa ilang pagsuroy sa nagkadaiyang tunghaan ila gyud gibalik-balik ang mga gimbuhaton sa paglikay sa sunog ingon man pagbiya na dayon kung mahitabo na gyud kini.

Gihulagway ni Pegarido nga epektibo ang ilang mga programa ug wala silay natala nga sunog gikan sa Marso 1.

Si konsehal Eduardo “Digul” Gullas III, chairman sa committee on Education nitataw nga dako og tabang nga mahatagan og kaalam ang kabataan parte sa paglikay sa sunog.

Asoy pa ni Gullas nga 45 ka tunghaan sa pampubliko ug 16 ka pribado ang gisuroy sa kabomberohan. — Gabriel C. Bonjoc (BANATNEWS)