Top 3 most wanted nasikop sa CIDG

CEBU, Philippines — Nasikop sa mga operatiba sa Criminal Investigation and Detection Group (CIDG) Cebu City Field Unit-7 ang usa ka top 3 most wanted provincial level nga adunay pending warrant of arrest sa kasong murder niadtong Martes sa gabii diha sa Barangay Sudlon II, Dakbayan sa Sugbo.

Ang nasikop mao si Benson Mahipos Borinaga, 35-anyos, molupyo sa Sitio Tubod, Barangay Sapangdako, Dakbayan sa Sugbo ug aduna sab kini balay diha sa Barangay Sudlon II.

Si Borinaga giingong maoy suspetsado sa pagpusil patay kang Louie De Los Angeles niadtong Sinulog Festival 2018 diha sa Sitio Tubod, Barangay Sapangdako kinsa ang biktima nakaangkon og samad pinusilan sa nagkadaiyang parte sa lawas nga maoy hinungdan sa kamatayon niini.

Matud sa kapolisan nga kauban sa suspetsado si Glen Borinaga sa paghimo sa krimen apan si Glen namatay kini sa niaging tuig sa wala matino nga hinungdan.

Si Regional Trial Court (RTC) Judge Estela Alma Singco-Caruso sa Branch 12 sa Dakbayan sa Sugbo maoy niisyu sa warrant of arrest batok kang Boringa penetsahan niadtong Septiyember 27, 2021 ug walay piyansa nga girekomendar.

Matud ni Police Lieutenant Colonel Randy Korret, hepe sa CIDG Cebu City Field Unit-7 nga nihimo sila og duha ka semana nga operational research ug intelligence operation aron matultolan ang nahimutangan sa suspetsado.

Dihang nakompirma nila ang gitagoan sa suspetsado nihimo dayon sila og operasyon pinaagi sa pakig-alayon sa Cebu City Mobile Force Company (CCMFC) aron i-serve ang warrant of arrest sa suspetsado. (BANATNEWS)