Niluwas sa tulo ka bata atol sa sunog pasidunggan ni Gullas

CEBU, Philippines — Pasidunggan ni Mayor Gerald Anthony “Samsam” Gullas, Jr.  sa Dakbayan sa Talisay ang usa ka manghimoay og chorizo nga nakaluwas og tulo ka bata atol sa sunog nga niulbo diha sa Purok Sambag, Sitio Laray, Dakbayan sa Talisay City.

Si Leo Niez, hingkod ang panuigon, maoy niluwas sa tulo ka bata atol sa pag-ulbo sa maong sunog.

Matud ni Niez nga ang tumong niya niadtong higayona sa pagsaka sa balay diin nagsugod ang kayo mao ang pagtabang sa pagpalong apan tungod sa kadako na sa kayo nikanaog siya apan nakadungog siya sa hilak sa mga bata hinungdan nga nisaka siya og balik ug nakita niya ang tulo ka bata nga babaye diin gidali niya kini og kuha ug niagi sila sila diha sa bintana aron makagawas sa balay nga nagdilaab.

Gibutyag ni Niez nga dihang nasapwang niya ang mga bata nanawag siya og tabang nga modawat niini tungod kay baga na kaayo ang aso.

Sa iyang bahin, si Gullas nagkanayon nga iyaha nang nahimamat si Niez niadtong  Martes sa hapon human niya nasayran ang maong panghitabo ug iyaha kining gipasalamatan sa bayanihon nga nahimo niini tungod kay bisan og lakip kini sa mga nasunogan apan wala gihapon kini nagmakuli sa pagtabang sa pagluwas sa mga bata.

Gibutyag ni Gullas nga karong Lunes atol sa ilang flag raising hatagan niya si Niez og pasidungog sa maayong buhat nga nahimo niini. Si Gullas mapasigarbohon sa nahimo ni Niez nga andam mosakripisyo aron makatabang sa uban.  (BANATNEWS)