Sobra 10,000 na ang naisyu nga citation sa CCTO

CEBU, Philippines — Anaa pa karon sa unang bahin sa tuig 2023 apan niabot na ngadto sa 10, 230 ka citation tickets ang naisyu sa Cebu City Transportation Office (CCTO) sa mga malapason sa balaod sa trapiko sulod sa buwan sa Enero.

Ang maong departamento naka- impound  og 647 ka motorsiklo,140 ka e-bike, 20 ka trisikad, usa ka pribado nga sakyanan .

Gihingusgan usab niini ang pag-clamp sa mga sakyang nga gipataka lang og parada ug aduna kini 361 ka kaso alang sa maong buwan.

Kasagaran sa mga kalapasan mao ang mga expired nga lisensiya, rehistro, wala pagtuman sa mga traffic sign.

Nasayran nga niadtong tuig 2022 ang CCTO nakatala og 132,299 ka traffic violators diin kasagaran nga violation mao ang overloading.

Nabatyagan na usab karon sa CCTO nga nisiaw pagbalik ang overloading.

"Mao kini nabatasan sa mga driver aning mga modern bus sa panahon sa kagabhion", tipik sa social media post sa CCTO.

Giawhag karon sa maong departmento ang mga nasakpan nga  badlongong drayber sa pag-settle sa ilang mga obligasyon aron dili mapasakaan og kaso ngadto sa korte.

Nanawagan ang CCTO sa mga motorista nga tumanon ang mga lagda sa trapiko aron malikayan ang kasamok sa kadalanan. —Rowena D. Capistrano (BANATNEWS)