Polis patay sa fun run

CEBU, Philippines — Wala na gyud matabang sa medical personnel ang 31- anyos nga polis nga miapil sa fun run nga gipasiugdahan sa usa ka pribadong kompaniya diha sa Cebu-Cordova Link Expressway(CCLEX) kagahapon, Pebrero 5 sa alas 4:58 sa buntag.

Ang namatay giila nga si Patrolman Lee Rodrocks Carbonilla, 31, na-assign sa Technical Support Company sa Regional Mobile Force Battalion(RMFB)-7 apan na-detail Regional Headquarters Support Unit(RSHU) PC Hills, Barangay Apas, Siyudad sa Sugbo ug lima ka tuig pa kini sa serbisyo.

Sigon sa tigpamaba ni Police Regional Office(PRO)-7 Director Brigadier General Jerry Bearis nga si Police Lt. Col. Gerard Ace Pelare ang impormasyon nga ilang nadawat samtang nagdagan si Patrolman Carbonilla kalit kining nakuyapan.

Gitabang pa kini sa medical team nga miresponde sa hitabo ug gidala a Cebu City Medical Center (CCMC) apan gideklarar kining dead on arrival sa attending physician.

Matud ni Pelare nga ang nakabutang sa report nga rason sa gikamatyan ni Carbonilla mao ang ‘acute decompensated heart failure’ nga maoy hinungdan nga kalit kining giatake sa kasing-kasing.

“Ang report ni-participate siya, on-going ang dagan then kalit lang og collapse,” matud ni Pelare.

Si Carbonilla, lumad nga taga San Juan, Southern Leyte gikatahong niapil sa 21-kilometer category sa maong dagan.

Subay niini, ang Force Commander sa RMFB-7 Col. Ronan Claravall miingon nga athletic ug kanunay kini nga moapil sa mga ingon ato nga kalihukan si Carbonilla, wala silay nadawat nga impormasyon nga duna kini gihambin nga balatian.

“Lagi siyang sumasama sa ganyang activity, fun run, scout ranger trained kasi ‘yan, maganda ang pangangatawan,” matud ni Claravall kinsa miangkon nga nakalitan sila sa gidangatan sa iyang sakop tungod kay gradwado gyud gani kini sa scout ranger training.

Tungod niini, nagpahinumdom si Claravall sa iyahang mga tawo nga bisan himsog ang panlawas, dili angay mokompiyansa ug mag-checkup gyud aron makasiguro.

“Always check yourself, magpunta sa opsital, magpa-checkup, magpa executive checkup, remember kahit anong yaman mo kung may dinadamdam ka naman walang silbi yan. Health is wealth talaga yan,” asoy ni Claravall.

Samtang si Pelare miingon sab nga sila sa PRO-7 motabang sab sa pagproseso sa mga gikinahanglan ug benepisyo para sa mga nailo ni Carbonilla.

Si Pelare midugang nga samtang maayo ang pag-apil sa mga physical activities alang maayong panlawas apan kini nagpahimangno nga kun dunay gipamati sa lawas o kaha kuwang sa pahuway dili pugson.

“Bisan og healthy kaayo ka when we involve ourselves to strenuous activities such as marathon dapat we should prepare for it. Unya check nato atong lawas basin og dili ta ready, wala ta katulog og tarong, so on and so forth so kini man gud siya well it’s good mangapil og physical activities ang mga police as a way of maintaining health but dili sad pugson, tan-aw nato wala ta sa kondisyon atong paminawon atong lawas kay pareha ani very unforeseen, very sad, wala gyud makita daan,” ni Pelare pa.  Ang PRO-7 adunay regular checkup sa panlawas sa mga sakop niini ug duna sab sila’y inventory sa mga dunay sakit aron ma-adjust ug matambagan sa Regional Medical and Dental Unit (RMDU)-7 sa unsay buhaton.

Si Konsehal Rey Gealon sa Dakbayan sa Sugbo nipaabot sa iyang pahasubo ngadto sa pamilya ni Carbonilla pinaagi sa usa ka resolution ug mo inquire usab sa Philippine Seven Eleven Corporation nga maoy nag organisar sa Run 7-Eleven 2023.

Buot masayran ni Gealon ang rules and regulations may kalabutan sa health screening process sa mga moapil nga runners ug sa ilang medical emergency contingency plan atol sa maong event alang sa paghimo unya og mga ordinansa bahin niining susama nga mga kalihokan. — /IBM (BANAT NEWS)