60 pamilya sa Alegria benepisaryo sa housing sa Philippine Red Cross

CEBU, Philippines — Moabot sa 60 ka pamilya sa lungsod sa Alegria ang gipaabot nga makadawat og balay gikan sa Philippine Red Cross.

Ang PRC Cebu Chapter Administrator nga si Atty. Maria Vera de Jesus mibisita ngadto kang gobernador Gwendolyn Garcia pagpahibalo sa ilang plano ug ilaha nang na-identify ang mga benepisaryo nga kasagaran biktima sa bagyong Odette niadtong Disyembre 2021.

Kasagaran sa maong mga biktima anaa puyo sa baybayon ug grabe kaguba ang pinuy-anan atol sa pangusokuso sa bagyo.

Si Alegria Mayor Gilberto Magallon maoy niila kun asa ang relocation site sa maong mga pamilya.

“The municipality will purchase the lot while PRC will fund the construction. As counterpart, PRC will ask beneficiaries to help in the construction of their new homes,” sumala sa Capitol Information Office.

Subay niini si Garcia nisugyot ngadto sa PRC nga kadtong motabang sa pagtukod sa balay angayan og hatagan og sweldo sanglit dili man kini sila makatrabaho sa panahon nga motabang sa konstruksyon sa mga balay.

Giabisohan sab sa gobernador ang PRC nga iorganize og homeowners group ang mga benepisaryo  aron maka-adopt kini og kaugalingon nga patakaran ug regulasyon sa pagpabilin nga limpyo sa ilang palibot utilities obligation, livelihood opportunities ug uban pa.

Dugang ni Garcia mas maayo sab nga iapil sa Red Cross sa ilang tabang ang livelihood programs sa mga beneficiaries hilabina nga kasagaran nila mga mananagat. —/IBM (BANAT NEWS)