Capability enhancement workshop sa PNP malamposon

CEBU, Philippines —  Malamposon ang pagpahigayon sa Capability Enhancement Workshop nga gitumong paghatag og seguridad sa mga Very Important Persons (VIPs) ingon man notable personalities dinhi sa Central Visayas.

Una niini ang Police Regional Office(PRO)-7 mipahigayon sa maong 5-day actual practice exercise for Protective Detail diha sa PRO-7 Quadrangle, Camp Sergio Osmeña Sr., Osmeña  Boulevard, dakbayan sa Sugbo.

Ang maong kalihukan personal nga gitambungan ni Malabuyoc Mayor Erlinda Piedad.

Ang actual exercise gipahigayon sa open ground sa South Road Properties gikan sa Enero 20, 2023 ug natapos Pebrero 3 ning tuiga.

Gilangkuban kini sa 160 ka mga partisipante diin 75 niini PNP personnel ug 85 ang civilian personnel nga kasamtangang naghatag og seguridad sa mga VIPs ug ubang  dagkong tawo sa Rehiyon.

Sa pamahayag ni Police Brigadier General Jerry Bearis, Director sa PRO-7 kini nagkanayon nga tumong sa maong workshop aron mapalambo ang skills ug kahibawo sa PNP ug mga civilian personnel mahitungod sa paghatag og seguridad sa mga iladong tawo sa komunidad.

Atol sa programa, gihatagan sab og awards ug certificate ang mga excellent ug performing teams ug individuals gikan sa PNP ug civilian team. (BANAT NEWS)