LCPO director misusi sa mga CCTV camera sa mga CCTV camera

CEBU, Philippines — Personal nga gibisita ni Lapu-Lapu City Police Office director , Police Col. Elmer Lim, ang mga barangay hall aron pagsusi sa mga gipangtaud nga CCTV cameras ug command centers.

Matud pa ni Lim, importante kaayo ang pagpanaud sa mga CCTV camera sa lain-lain nga lugar tungod kay makatabang kini aron kaminusan ang mahitabong krimen.

Gidayeg ni Lim ang pipila ka mga barangay nga nagtaud na ug mga cctv cameras ug pagmontar usab ug mga command centers sama sa Agus, Marigondon, Maribago ug Basak.

Gipasalamatan niini ang maong mga barangay sa dakbayan kinsa nigasto gayud sila sa maong proyekto nga daku og tabang sa pagsumpo sa krimen ug aron pagkuha og footage sa ubang panghitabo sa ilang lugar.

Gidasig sa City Director ang ubang kabarangayan nga mo invest ug mobutang gayud ug mga cctv cameras ilabi na kadtong mga lugar nga wala pa niini tungod kay daku usab kini ug tabang sa pagsulbad sa krimen ug dili lang kutob sa pagpakubos sa krimen.

Tinguha usab ni Lim nga adunay mga CCTV Camera usab didto sa Isla sa Olango ug lakip usab niyang susihon ang mga tunghaan ilabi na kadtong apektado sa bagyong Odette. (FREEMAN)