Garcia nibahad sa chief of hospitals sa probinsiya

CEBU, Philippines — Si Gobernador Gwendolyn Garcia nibahad ngadto sa chief of hospitals sa 16 ka provincial ug district hospitals sa Probinsiya sa Sugbo.

Kini human nigawas ang rating sa mga tambalanan sa gihimong assessment sa evaluation team nga giumol sa probinsiya nga gipangulohan sa consultant sa panglawas sa Kapitolyo Dr. Mary Jean Loreche.

Sa mga tambalanan sa probinsiya nakakuha og perfect score nga 5.0 ang Balamban ug Carcar Provincial Hospitals ug ang Camotes District Hospital.

Ang Tuburan Provincial Hospital nakakkuha og 4.8; Minglanilla District Hospital, 4.8; Oslob District Hospital, 4.6; Bogo Provincial Hospital, 4.5.

Ang Malabuyoc District Hospital, 4.3 ang score; Badian District Hospital, 4.3; Argao District Hospital, 4.2; Daanbantayan District Hospital, 4.0 o “very satisfactory” rating.

Ang Bantayan District Hospital, 3.8; Barili District Hospital, 3.8; Sogod District Hospital, 3.5; Pinamungahan District Hospital, 3.4; ug Danao Provincial Hospital, 3.0.

Si Loreche nagkanayon nga ang gibasehan sa grado sa mga hospital mao ang criteria nga gihatag sama sa leadership ug management, client satisfaction, infrastructure ug economic.

Niadtong bulan sa Septiyembre sa niaging tuig nagsugod sila si Loreche og assessment pinaagi sa pagbisita sa mga hospital diin human sa ilang obserbasyon ilang gihatagan ang chief of hospitals sa listahan sa mga angay nga palambuon ug gihatagan og tulo ka bulan aron kini nga maayo ug mahan-ay.

Human sa tulo ka bulan nibalik og suroy ang evaluation team aron masuta kon nasunod ba ang ilang mga rekomendasyon ug mao kini ang gibasehan sa score nga nakuha sa matag hospital.

Apil sa mga obserbasyon nga nakita sa team mao ang pagmentinar sa kalimpiyo sa hospital, pag-ayo sa mga naguba nga istraktura sulod sa tambalanan, pagtubag sa taas nga linya sa mga pasyente ug uban pa.

Si Garcia nagkanayon nga aduna siya’y duha ka aksiyon nga himuon.

“Ang most immediate is address the most glaring and that which would cause more misery and suffering to our people should the type of management continue for even a day more. So kana that’s the immediate, I will have to do some changes there”, matud ni Garcia.

Ang ikaduha mao ang paghatag og 60 ka adlaw sa chief of hospitals ug sa mga administrators nga palambuon ug ayohon pa ang ilang pagtrabaho, pagdumala ug paghatag og serbisyo sa mga pasyente sa tambalanan.

Human sa 60 ka adlaw adunay laing assessment nga himuon ang team.

Matud ni Garcia nga kong walay kabag-ohan “as I said shape up or ship out”. (BANATNEWS)