Garcia niluwat og EO pagluway sa special permit sa PUVs

CEBU, Philippines — Gilugwayan ni Cebu Governor Gwendolyn Garcia ang special permit sa mga modern  Public Utility Vehicles (PUVs) nga mobiyahe gikan sa pipila ka mga lokalidad sa Probinsiya sa Sugbo padulong sa IT Park sa Dakbayan sa Sugbo, Park Mall ug vice versa.

Kini gumikan kay ang special permits nga giisyu sa Land Transportation Franchising and Regulatory Board (LTFRB)-7 na-expire na niadtong Enero 31, 2023.

Base sa Executive Order No. 5 nga giluwat ni Garcia niadtong Enero 31 gilugwayan ang special permit sa PUVs sa mga mosunod nga rota Liloan-IT Park (20 units); Consolacion –IT Park (20 units); Mandaue –IT Park (10 units); Naga-IT Park (20 units); Minglanilla –IT Park (15 units); Minglanilla –Parkmall (20 units); Talisay– IT Park (30 units) ug Talisay – Parkmall (15 units).

Niadtong Enero 31, 2023 sa hapon nibisita diha sa buhatan ni Garcia ang mga mayor sa nahisgutang mga lungsod ug siyudad uban kang Direktor Eduardo Montealto sa LTFRB-7 diin ilang gipadayag ang ilang yango-ngo ngadto sa gobernador. Ang maong EO ni Garcia molungtad kini og 45 ka adlaw isip short term solution.

Matud ni Garcia nga sulod sa maong mga adlaw mohimo sila og mga lakang alang sa “long term solution”.

Una na niini ang pagpahigayon og tulo ka adlaw nga seminar karong unang semana sa bulan sa Pebrero sa tanang city ug municipal planning development officer sa mga LGU sa probinsiya uban sa mga hepe sa traffic enforcement team sa lokalidad.

Kini aron magiyahan sila sa paghimo sa ilang tagsa-tagsa ka Local Public Transport Route Plans (LPTRP).

Matud usab ni Garcia nga adunay petsa kanos-a mosumiter ang LGUs sa ilang tagsa-tagsa ka LPTRP ngadto sa Provincial Planning and Development Office ug sa LTFRB alang sa pag-review.

Human sa review sa LTFRB-7 ug sa PPDO, laing tulo ka adlaw nga workshop na usab ang himuon aron mohimo na og adjustment ug mahiusa na ang tanang LPTRP ug makahimo og Provincial LPTRP nga isumiter ngadto sa central office sa LTRFB alang sa approval.

Subay niini, gipahibalo sa kagamhanan sa Dakbayan sa Talisay nga magpadayon ang naandang rota sa PUV gikan sa Talisay paingon sa IT Park ug Parkmall. —Gabriel C. Bonjoc (BANATNEWS)