Limpiyo nga Carbon ilusad karong Sabado

CEBU, Philippines — Human sa pagbansay-bansay kalabot sa food handling ang Carbon Market vendors ug ang tibuok komunidad niini gilaoman nga magpadayon sa kalimpiyo.

Lakip niini ang pag-recycle ug pag-repurpose ilabi na sa mga botilya pinaagi sa “Shot for a Cause”. Ang kalihokan adunay linya nga “Limpyo nga Carbon, magsugod kanato” nga ilusad karong Sabado diha sa Carbon Night Market area.

Nasayran nga adunay 10 ka specially designed trash bins nga i-turn over atol sa seremoniya.

Ang kalihokan karong Sabado gitawag nga Shot for a Cause tungod kay ang mga basurahan gidesinyo sama sa mga ring sa basketball nga ibutang sulod sa Carbon District.

Ang kita gikan sa mga nakolekta nga botilya gamiton dayon sa paghimo og daghang mga basurahan alang sa samang  katuyoan nga ipanghatag sa ubang mga organisasyon sa maong lugar.

Gihatagan og espesyal nga pagtagad ang mga botilya gumikan kay usa kini sa mga hinungdan sa pagbaha tungod kay makabara kini sa mga kanal uban sa mga plastic.

Ang maong proyekto gipasiugdahan sa United Continental Eagles Club ug sa  pakigtambayayong sa Cebu2World-Megawide uban sa suporta sa Police Station 5 sa Cebu City Police Office ug sa  kagamhanan sa Dakbayan sa Sugbo.

Sa laing bahin, gimandoan karon ang mga kadagkoan sa mga buhatan nga nahimutang  diha sa sulod sa compound sa city hall sa Dakbayan sa Lapu-Lapu sa paglabay sa ilang basura deretso ngadto sa nag- parking nga garbage truck  duol sa sports complex. Giluwatan ang maong kamandoan ni Atty. Danilo Almendras, city administrator sa nahisgutang siyudad sa niaging adlaw. Ang pagluwat ni Almendras og memorandum isip pagsanong kini sa hangyo ni DR Ronaldo Oporto sa buhatan sa  City Environment and Natural Office ( CENRO) sa pagsiguro sa kalimpiyo sa palibot sa city hall.

Matud ni Almendras nga si Oporto nipasabot nga nakamatikod kini nga ang mga buhatan sa sulod sa city hall anha molabay sa ilang basura duol sa sports complex diin ang mga residente panahon sa gabii adto usab molabay sa ilang mga basura hinungdan nga nagtipon-og kini.

Si Oporto nagkanayon nga ang garbage truck magsugod sa parking duol sa sports complex sa alas 4:00 sa hapon hangtud sa alas 5:0 sa hapon sa matag adlaw. Caecent No-ot Magsumbol, Romeo T. Limpangog (BANATNEWS)