Mga utility company pabayaron og abang sa Kapitolyo

CEBU, Philippines — Gusto sa Kapitolyo nga magbayad og abang ang utility companies nga naggamit sa luna nga gipanag-iya sa Probinsya sa Sugbo diha sa dalan Osmeña Boulevard, Dakbayan sa Sugbo.

Si Gobernador Gwendolyn Garcia nagkanayon ngadto sa representante sa Visayan Electric Company (VECO), Metropolitan Cebu Water District (MCWD) ug  telecommunication companies atol sa ilang tigom niadtong Enero 26, 2023 nga 20 metros ra gyud ang gilapdon sa orihinal nga gigahin nga luna diha sa maong lote sa  Osmeña Boulevard.

“However, the Department of Public Works and Highways (DPWH) that constructed the road violated this plan when it added four more meters in width for the road (two meters on each side) and six meters for the sidewalk (3 meters on each side), effectively encroaching on Capitol properties where the utility boxes now stand”, base sa taho sa Sugbo News.

Atol sa ilang tigom ang presidente ug chief operating officer sa Visayan Electric  Raul Lucero nipadangat sa kaandam nila mobayad sa compensation sa pagbutang nila og  utility boxes ug electric lines nga anaa ilawom sa sidewalks diha sa  Osmeña Boulevard sugod sa  Fuente Circle padulong diha sa Capitol Compound.

Matud sa Visayan Electric aduna sila’y 10 ka utility boxes sa duha ka habig sa dalan nga adunay underground electric lines nga adunay gitas-on nga length of 1,167.60 metros nga nahimutang sa 350.28 metro kwadrado nga luna.

Sa bahin sa  MCWD,  base usab sa report sa Sugbo News ang  general manager sa MCWD  Edgar Donoso nagkanayon nga maghulat sila sa desisyon sa ilang board kon mobayad ba sila sa Kapitolyo o ilaha kining isang-at ngadto sa korte.

Ang MCWD nag-mentinar pag-operate og usa ka well station diha sa maong dalan.

Samtang ang telecommunication companies sa Globe ug PLDT nagkanayon nga wala na sila’y utility boxes diha dapit sa Osmeña Boulevard diin ilaha na kining gibalhin niadtong tuig 2014. (/BDB) (BANAT NEWS)