P18 milyones shabu nasakmit sa tulo ka operasyon

CEBU, Philippines — Moabot sa kapin P18 milyones nga balor sa illegal nga drugas ang nasakamit sa managlahi nga operasyon sa kapulisan Provincial Intelligence Unit(PIU) sa Cebu Police Provincial Office(CPPO) ug City Drug Enforcement Unit(CDEU) ug City Intelligence Unit(CIU) sa Lapu-Lapu City Police Office(LLCPO) ug Talisay City Police Station.

Huwebes sa gabii, Enero 26, 2023 ang mga tinugyanan sa PIU nagpahigayon og buy-bust operation sa Sitio Upper Bagacay, Barangay Tayud, Lungsod sa Consolacion.

Nadakpan nila si Lunicito Labatid, alyas Looney, 28, residente sa Barangay Quiot, Siyudad sa Sugbo ug nabutang sa Unified PNP-PDEA Top 10 Regional Priority Target.

Atol sa operasyon ang dinakpan nakuhaan og dili momenus duha ka kilo nga gituohang shabu nga mokantidad og P13.6 milyones.

Sigon ni Police Lt. Col. Mark Gifter Sucalit, Deputy Provincial Director for Operations sa CPPO ang plantalya sa dinakpan habal-habal driver apan courier sab diay kini sa usa ka dakong drug personality nga nailhan na sa kapulisan.

Dugang ni Sucalit nga kinilo gyud ang shabu nga ma-dispose sa suspetsado sa Cebu Province.

Ang pagkasikop ni Labatid resulta kini sa mga nangaing operasyon sa kapulisan CPPO diin natumbok nila ang matod pa grupo sa dinakpan.

Duna nay mga ngalan nga nakuha ang kapulisan nga ilaha karong gisusi maong dili una sila kahatag og mga ngalan.

“Sa pagkakaron makita nato nga dako-dako gyud siya nga grupo sa mga latest nato nga nakuha nga mga impormasyon. But of course dako pud ni siyang dagok kay mao na sila’y usa ka grupo nga na identify nato karon through sa kani nga operation,” matud ni Sucalit.

Matud pa ang source sa drugas sa dinakpan gikan sa Luzon ug ang transakiyon sa Sugbo himoon.  Si Sucalit miingon dako kini og epekto sa supply sa drugas ilabi na sa Probinsiya sa Sugbo.

Samtang pasado ala-una sa udto kagahapon, Enero 27, 2023 nadakpan sa kapulisan sa CDEU ug CIU sa LLCPO ang usa ka High Value Individual nga si Gerard Alipin Baron atol sa gihimong buy-bust operation sa Sitio Mustang, Barangay Pusok, Dakbayan sa Lapu-Lapu.

Si Baron, 39, lumad nga taga Lungsod sa Pinamungajan ug temporaryo nga nagpuyo sa Barangay Kamputhaw, Siyudad sa Sugbo.

Ang suspetsado nakuhaan og 525 gramos nga gituohang shabu nga mobalor og P3.5 milyones, usa ka kalibre .45 nga armas, upat ka bala ug mga drug paraphernalia.

Si Labatid mag-atubang og kasong kalapasan sa Section 5 ug 11 sa Article 2 sa Republic Act 9165 samtang si Baron pasakaan og kasong kalapasan sa Republic Act 9165 ug Republic Act 10591.

Sa pikas bahin, dul-an usa ka milyon ka pesos nga balor sa ilegal nga druigas ang nasakmit sa kapulisan sa Talisay City Police sa ilang gipahigayon nga buy-bust operation sa Sitio Mananga 2, Barangay Tabunok Huwebes sa gabii.

Ang nasikop naila nga si Flordeliz Dacles, 40, biyuda, taga Sitio Santo Niño Barangay Suba ning Dakbayan sa Sugbo.

Nangulo sa maong operation si Police Lt. Col. Randy Caballes, Hepe sa Talisay City Police Station uban sa mga ginsakopan niini.

Nasakmit gikan sa maong dinakpan ang 140 gramos sa gituohan nga shabu nga mobalor og P952 mil, buy-bust money, ug P300 nga gituohan nga halin.

Ang dinakpan nasikop na kaniadto Hulyo 2017 sa CIB sa CCPO tungod sa posesyon og ilegal nga drugas  ug nagawas niadtong 2019 human na dismiss ang kaso batok kaniya.

Sumala sa kapulisan ang dinakpan giingong bodegera ug makadispatsar ug 200 gramos matag semana sa Metro Cebu area. Matud pa naa sa New Bilibid Prisons sa Muntinlupa ang kontak niini nga nag-suplay kaniya og shabu. —Romeo Marantal, Romeo Limpangog ug Rowena Capistrano/IBM (BANAT NEWS)