Rama gipasakaan og reklamo ngadto sa Ombudsman

CEBU, Philippines — Walay kalabotan ang politika, kaluoy sa katawhan nga nawad-an og trabaho maoy rason nganong niduso og reklamo ang usa ka pribadong molupyo sa Cebu City batok kang Mayor Michael Rama.

Kini maoy pagtin-aw ni Jonel Saceda, adunay alyas nga “Inday Josa Chongbian Osmeña” kalabot sa gipasaka niyang reklamo nga  nepotism, grave misconduct, ug violation of anti-graft and corrupt practices act, ug uban pa batok sa mayor.

"Walay  politiko nga nagpaluyo nako , akoa ra gyud ni nga kabubut-on," matud pa ni Saceda sa pakighinabi niini sa Banat News kagahapon .

Matud niya dili siya konektado ni bisan kinsang politiko o politikanhong partido.

Apan giangkon niya nga supporter siya kaniadto sa Bando Osmeña Pundok Kauswagan (BOPK) apan dugay na siya nibiya sa maong grupo, ug wala na siya nag-apil apil sa piniliay niadtong 2022.

Gipasaka niya sa  Office of the Ombudsman-Visayas ang iyang mga  reklamo sa niaging adlaw gumikan matud pa niya gipatrabaho sa city hall ang duha ka igsuon sa asawa sa mayor.

Kasamtangang nagbakasyon  si Rama  ug giingong mohatag ra kini sa iyang tubag sa kalabot sa maong isyu sa "proper forum."

Sa affidavit ni Saceda, gitataw niya nga niadtong tuig 2022  nakasulod isip empleyado sa City Hall ang duha ka igsuon sa asawa sa mayor.

Gitataw ni Saceda nga sa Oktubre 28, 2021  kasal sa mayor ug sa iyang asawa nga si Marilou Gimenez Mandanat-Rama.

Matud pa niya nga sa maong senaryo, aduna gyuy nepotismo nga gibuhat ang mayor.

Sa iyang affidavit, si Saceda nibarog nga gipatrabaho sa City Hall ang bayaw ni Rama nga so Elmer Gimenez Mandanat, samtang ang lain bayaw niya kay gipatrabaho sa isip administrative aide III ubos sa Cebu City Medical Center.

Nalakip pud sa affidavit ang kopya sa plantilla sa casual appointments sa Office of the Mayor ug sa Cebu City Medical Center.

Giangkon ni Saceda nga  gi-bash siya karon og maayo sa social media ,apan iyang gitataw nga  gusto ra gyud niya nga makaangkon ang katawhan sa makiangayon    nga pagtratar sa gobyerno.

"Dili man ni para ako . Ako ning gibuhat aron mobarog isip tingog sa katawhan," dugang pa ni Saceda.

Ang executive secretary ni Rama nga si Atty. Collin Rosell sa pakighinabi sa Banat News  miingon nga naghuwat lang siya sa kopya sa maong kaso, aron makahatag og lapad nga tubag .

Matud pa niya nga base sa iyang pasiuna nga pakisusi , na-hire ang mga igsuon sa asawa sa mayor  wala pa sa katungdanan si Rama.

Matud pa ni Rosell nga "malisyoso" ra ang maong kaso , apan ang uban niya nga komento kay iyaha ra nga ipabuhagay sa higayon nga makadawat siya sa kopya.

Gani gitataw niya nga dili basta-basta ang pagsulod og trabaho sa city hall kay duna gyud kini lapad nga screening pinaagi sa Human Resources Department  busa dili gyud makalusot ang nepotismo. (BANATNEWS)