Babaye nagpapolis-polis gireklamo nadakpan sa CCMFC

CEBU, Philippines — Usa ka 21-anyos nga babaye kinsa nagsul-ob og uniporme sa Philippine National Police ang gidakop kagahapon sa buntag diha sa Barangay Lahug, Dakbayan sa Sugbo.

Ang nasikop mao si Lyza Dagpin, lumad nga taga Dapitan City, Zamboanga Del Norte.

Si Police Major Eraño Regidor, hepe sa Mabolo Police Station sa Cebu City Police Office (CCPO) nagkanayon nga gialarma si Dagpin human giingong nagpaila kini nga polis ug giingong nangilkil sa mga tindahan og prutas ug sinina diha sa nahisgutang lugar ug ang mga gipangayoan nagduda.

Atol sa maong hitabo ang kapolisan sa Cebu City Mobile Force Company nagpahigayon og Urban Patrolling gikan sa may JY paingon sa IT Park ubos sa direktiba ni  Police Brigadier General Jerry Bearis, direktor sa Police Regional Office-7 alang sa police visibility.

Giingong naatol nga nagpatrolya usab ang CCMFC diha sa lugar hinungdan nga nakapangayo og tabang ang mga biktima.

Ang suspetsado giduol sa mga polis ug gisukit-sukit aron masuta kong tinuod ba kining polis.

Ang suspetsado gipangayoan og identification card, gipangutana kong unsa nga batch ug kinsa ang iyang mga classmate apan wala kini makatubag ug giingong niangkon nga dili siya polis.

Ug giingong pag-abot diha sa police station nausab ang tunada sa suspetsado nga sama og adunay problema sa pangisip.

Karong adlawa i-inquest ang suspetsado ug ang piskaliya na ang modesisyon sa kaso.

Pasakaan og kasong usurpation of authority ug illegal use of uniform and insignia ug giawhag usab sa kapolisan ang mga biktima sa suspetsdo nga mosang-at usab og reklamo.  (BANATNEWS)