Vitor bangis sa unang depensa

CEBU, Philippines — Gitinuod ni John Virgel "Valiente" Vitor ang iyang mga gipanulti.

Kini human si Vitor milampos pagdepensa sa iyang WBO Oriental super featherweight title pinaagi sa pagpatukay-ang sa Koreanong si Dong Kwan Lee sud lamang sa duha ka hugna sa main event of "Kumong Bol-anon 8" sa PMI Bohol Boxing Promotions niadtong Huybes sa gabii didto sa Calape Cultural and Sports Complex sa Calape, Bohol.

Dominante kaayo si Vitor sama sa miagi niyang away tulo ka bulan na ang milabay didto sa Dimiao diin iyang gipalukapa si Arnon Yupang sa Thailand sud gihapon sa duha ka hugna aron sakmiton ang WBO regional belt.      

"Wa ko mag-expect nga ingon ato kasayo nako siya matumba. Nakakita lang gyud ko og opening mao wala nako gipalabay ang higayon nga ako siyang ma-knockout," matud pa ni Vitor, nga nagbitbit na karon og 20-2 nga rekord uban ang 13KOs. Si Lee natagak sa 16-3-2, 6KOs.

Ang garbo sa dakbayan sa Tagbilaran unang mitumba ni Lee gamit ang solid right overhand sa tunga -tungang bahin sa ikauhang hugna apan ang bisitang Koreano dali nga nakabarog.

Pipila ka gutlo ang milabay, si Vitor mipatupa og makabungog nga left hook ngadto sa apapangig nga nakapalukapa og usab ni Lee.

Ning higayona, si Lee nagkalipong-lipong na ug nalisud og barog sa dihang giiphan hinungdan nga giundang ni reperi Danrex Tapdasan ang away sa nahibiling dos segundos sa ikaduhang hugna.

"I'm very impressed, very satisfied. Mas ngilngig pa ang iyang gipakita karon kay sa miagi niyang duwa mao nang happy kaayo ko," matud pa ni PMI Bohol Boxing Promotions big boss Floriezyl Echavez Podot nga maoy manedyir ni Vitor. "Kung makuha nato ang world title next year mas maayo. Hinog na kaayo siya."

Sa supporting main event, ang katropa ni Vitor sa PMI Stable nga si Daniel “Vaquero” Nicolas gikan sa Palawan  nakaipsot pinaagi sa split decision batok sa lig-on sab kaayong si Jestine Tesoro sa Bansalan, Davao del Sur aron langkaton ang korona isip WBO Oriental Youth featherweight champion.

Human sa walo ka hugna nilang huego todo nga kumbati, si judge Danrex Tapdasan mi-iskor og 77-74 alang ni  Tesoro apan sila si Edward Ligas ug Rafael Osumo parehong mikadlit og 77-75 alang ni Nicolas hinungdan sa split nga desisyon.

Gawas nga miinat sa way pilde niyang record ngadto sa 7-0 uban ang 4KOs, si Nicolas nahimo sab nga ikalimang regional champion gikan sa PMI Bohol Stable sunod nilang Vitor, Regie "The Filipino Phenom" Suganob (IBF Youth light flyweight), Jake "El Bambino" Amparo (WBF Asia Pacific minimumweight), ug Jhunrille Castino (WBF Asia Pacific super bantamweight).

Si Castino mipakita sab og aksiyon sa malampuson nga promosyon nga gipaluyohan sa Calape LGU ubos sa liderato ni mayor Julius Caesar Herrera. Iyang gibuntog si Emmanuel Mogawa sa Dipolog City pinaagi sa unanimous decision.

Laing upat pa ka mga batos sa PMI Stable ang nagmadaogon.

Gipasurender ni Shane Gentallan si Ronald Ewican human sa ikatulong hugna, si Pablito Balidio mi-TKO ni Ernesto Camiguing sa oras nga 2:29 sa ikalimang hugna, samtang sila si Rodel Suganob ug Gerwin Asilo mibuntog nilang Mark Glen Antaran ug Kier Clenton Espere pinaagi sa unananimous decision.

Sa laing bahin, nagmalampuson ang tulo sa upat ka mga Sugbuanon nga miaway sa undercard. Sila si Christian Balunan sa Consolacion ug Rjay Siose sa Mandaue City parehong milupig nilang Ramil Yacapin ug Dave Barlas pinaagi sa desisyon, samytang si Reymart Tagacanao sa Carcar City midispatsa ni Jerry Tabago sud lamang sa usa ka hugna. Bugtong naparot mao si Ryan Maano sa Tuburan nga miyukbo ni Arnel Tinampay sa Ubay, Bohol human sa upat ka hugna.

Sa laing resulta, si John Vincent Pangga sa Cagayan de Oro City nanginahanglan lamang og 54 segundos aron patikangkangon si Ruel Julian sa Malaybalay, Bukidnon.