Australian company motukod og WTE facility sa siyudad
CEBU, Philippines — Usa ka Australian company ang niduso og proposal ngadto sa Cebu City Government alang sa pagtukod og modular Waste-To-Energy facility nga makalimpyo sa toneladang basura sulod sa sirado na nga Inayawan landfill.
Si Anthony Aucone, ang chief executive officer sa NextGen NRG, nakigtagbo kang Mayor Michael Rama kagahapong adlawa aron hisgutan ang maong sugyot.
nagkanayon si Aucone nga ang NextGen NRG nagplano nga tukoron ang pasilidad nga walay magasto ang City Government, nga nagtumong sa paglimpyo sa Inayawan landfill ug pag-convert sa toneladang basura ngadto sa biol-fuel.
Kun maaprobahan ang maong proposal, molanat og pito ka tuig ang paglimpyo sa Inayawan landfill.
Makahatag usab kini og kahigayonan sa panarbaho, sanglit dul-an sa 300 ka mga tawo ang mopadagan sa operasyon sa pasilidad.
Sa laing bahin , usa ka kompaniya nga naggamit sa teknolohiya sa Japan ang nitanyag nga magtukod dinhi sa siyudad og Material Recovery Facility (MRF), nga susama sa gitukod sa dakbayan sa Lapulapu.
Ang Suki Trading Corporation (STC) mihimo sa ilang proposal atol sa panagtigom sa Task Force Gubat sa Baha sa niaging adlaw diin si kanhi Environment Secretary ug Task Force Chairman Roy Cimatu ang nangulo sa tigom.
Matuman lang ang maong tingoha kun dunay Joint Venture Agreement (JVA) tali sa kompaniya ug sa Kagamhanan sa Dakbayan.
Samtang gipaabot nga masulbad na ang problema sa suplay sa tubig sa dakbayan sa Sugbo human sa hingpit nga operasyon sa Lusaran water treatment facility sa JE Hydro ug Bio-Energy Corporation sa sitio Proper, Lusaran ning dakbayan.
Ang pribadong kontraktor sa Metropolitan Cebu Water District, JE Hydro ug Bio-Energy Corporation niingon, nakompleto nila ang 20 milyones ka litro kada adlaw (MLD) nga pasilidad sulod sa 150 ka adlaw taliwala sa pipila ka mga pagsulay.
Ang proyekto aduna usab hybrid ug non-conventional nga tinubdan sa enerhiya, lakip ang usa ka integrated renewable energy facility nga naglangkob sa floating solar panels nga adunay battery energy storage system ug run-of-the-river micro-hydroelectric power system, ug pipe laying work sa usa ka 30-kilometros nga pipeline.
Si MCWD chairman Joey Daluz nipasabot nga adunay tulo ka component sa maong proyekto diin ang water treatment facility sa Lusaran fully operational na.
Matud ni Daluz, gikan sa pasiunang 15 MLD nga ihatod, ang MCWD mi-aprobar sa dugang 15 MLD gikan sa JE Hydro ug mahimong moabot sa 35 MLD nga JE Hydro sulod sa unom ka bulan. Ang mga bukirang barangay sa North District nga moabot sa Capitol area mahimong maserbisyuhan niini. —/MEL (BANAT NEWS)
- Latest