DepEd mipasidaan nga simple lang ang Christmas party sa tunghaan

CEBU, Philippines — Mipahimangno ang Department of Education sa nagdumala sa mga tunghaan nga himoong simple ang Christmas Party ug dili pinugsanay ang pag amot sa mga tinun-an.

Matud pa ni Dr. Salustiano Jimenez, Regional Director sa DepEd Central Visayas nga kinahanglan simple apan mabulokon ang pagpahigayon sa mga Christmas party.

Dugang ni Jimenez, higpit nga gidili ang pag-obligar sa mga tinun-an sa pag amot sa galastohan sa party ug kun walay ikaamot ang mga bata paapilon gihapon sa mga kalihukan sa pasko.

Gipasidan-an ni Jimenez, ang mga tagduma sa tunghaan nga anha ra himoon ang Christmas Party sulod sa mga eskwelahan.

Gihimug-atan sa Dep-ed official nga dili mamahimong himoon nga bargain sa grado ang pag-apil sa party, tungod kay magdepende gyud ang tanan sa sitwasyon sa mga tinun-an kung makatambong o dili sa kalihukan.

Ang buhatan sa Dep-ed bukas sa pagdawat ug mga reklamo kung ugaling adunay mga tunghaan nga milapas sa lagda. Nasayran magsugod ang Christmas break sa Disyembre 16 ug mobalik sa Enero 3 sa sunod tuig 2023. (BANATNEWS)