Cash aid sa mga seniors ihatag karong Disyembre 10

CEBU, Philippines — Gikatakda nga mahitabo karong Sabado, Disyembre 10 ang laing hugna nga pag-apod apod sa financial assistance alang sa mga senior citizen dinhi sa Dakbayan sa Sugbo.

Kagahapon nakigtagbo ang Senior Citizens Affairs (OSCA) sa mga barangay kapitan ug gituki ang maong butang.

Suma pa sa pangulo sa OSCA nga si Vicente Esmeña nga nakig-alayon gyud sila ngadto sa kabaranggayan aron mahimong tulin ang distribusyon sa financial assistance.

Sa kasamtangang listahan sa OSCA, adunay 88,450 ka mga rehistradong senior citizens.

Suma pa ni Esmeña nga nitambong si  Mayor Michael Rama sa ilang tigom kagahapon ug nipasidaan kini ngadto sa mga kapitan ug sa mga representante sa Cebu City Hall Satellite Office nga magtinabangay o mohatag gyud og kooperasyon  aron magmalampuson ang distribusyon.

Moabot ngadto sa P2, 000 ang madawat sa matag benepesaryo karong Sabado, nga alang sa bulan sa Nobiyembre ug Disyembre.

Gipahimangnoan usab niini ang mga kapitan nga dili hikawan ang mga senior citizen sa pagamit sa pasilidad sa barangay isip venue sa distribusyon sama nalang sa mga barangay gym. 

Ang katapusang pag-apod apod sa pinansyal nga ayuda sa mga katiguwangan nahitabo sa birthday ni Mayor Rama niadtong Oktubre 28. (BANATNEWS)