Unom nga mi-check in sa motel na-missing

CEBU, Philippines — Unom ka mga lalaking mi-check in sa usa ka motel sa Barangay Talamban sa Dakbayan sa Sugbu niadto pang Septiyembre 26, 2022 nga giingong gi-pickup og mga lalaking nagpailang mga polis, apan hangtud karon wala na sila makit-i og balik.

Si Cebu City Police Office Director Col. Ireneo Dalogdog mimando sa hepe sa Police Station 8 Police Major Alvin Llamedo nga susihon ang maong report.

Una niini, ang kabanay sa maong mga na-missing  midangop sa programa ni Senator Raffy Tulfo nga Raffy Tulfo In Action aron sila matabangan pagpangita sa nawala nila nga mga kabanay.

Ang mga kabanay miingon nga gikuha sa mga nagpailang mga polis ang mga na-missing samtang sila nag check-in sa usa ka motel niadtong Septiyembre 26, 2022.

Ang Police Station 8 nakigalayon karon sa manager sa maong motel. Giangkon ni Llamedo nga pagkakaron wala pay pormal nga reklamo silang nadawat diha sa ilang buhatan.

“As of now on-going ang investigation natin, however kinumbinsi natin yung complainant na magpunta personally sa police station for further investigation kasi sa ngayon parang hindi pa tayo nakapag full blown (investigation) kasi walang proper complaint. Kasi kapag pumunta sila doon sa police station kailangan mag-execute sila ng affidavit of complaint,” pasabot ni Llamedo.

Base sa pakighinabi sa Police Station 8 sa mga staff ug manager sa maong motel niadtong Septiyembre 10 mi check-in sa ila ang walo. Nianang pagsunod adlaw Septiyembre 11, nigawas ang duha. Way nakahibalo kun asa niadto ang duha o unsay nahitabo kanila.

Apan nianang Septiyembre 26 gikatahong dunay grupo sa mga lalaking nagpailang mga polis ug duna silay operasyon diha sa maong motel ug ang nahibiling unom gisignit sa maong grupo.

“During that incident nagpakilala ‘yung mga tao na dumukot na police officers daw sila,” matud ni Llamedo.

Nasayran nga ang motel na ang ni-report sa kapulisan sa maong insidente tulo ka adlaw human sa hitabo kay nahibulong sila nga wala man baliki ang ilang mga butang. (BANATNEWS)