Nagpuyo ilawom sa mga taytayan papahawaon
CEBU, Philippines — Gimando ni Cebu City Mayor Michael Rama nga pahawaon na ang tanang nagpuyo ilawom sa mga taytayan sa Dakbayan sa Sugbo tungod kay peligroso gyud para kanila ang maong lugar.
Gawas nga kuyaw kaayo ilang kahimtang, usa sab sila sa nakatampo sa kahugaw karon sa mga ilawom sa mga taytayan sa siyudad.
“Tanang naa sa bridge…That has to be taken out from there .Because sige’g reklamo, sige tag limpyo ..unya ang mga waste tua pa sa ubos sa tulay..adto didto,” matud pa sa mayor .
Matud pa ni Rama usa kini sa iyang gihisgutan uban sa iyang environmental consultant ug Task Force Gubat sa Baha chief, kanhi Environment Secretary Roy Cimatu.
Nagpadayon karon ang imbentaryo sa gidaghanon sa mga nagpuyo lawom sa taytayan. Ini’g kahuman sa imbentaryo isunod dayon ang clearing operation.
Giangkon sa mga opisyal sa siyudad nga dili dayon mabuhat ang demolisyon kun walay kabalhinang mas luwas nga kapuy-an ang mga apektado.
Sa pikas bahin, usa ka collaborative planning workshop seminar ang gihimo tali ni Rama ug Mayor Jonas Cortes sa Siyudad sa Mandaue alang sa kasulbaran sa problema sa baha sa duha ka kinadak-ang siyudad sa Metro Cebu.
Gituki sa duha ang drainage system nga magdugtong sa duha ka siyudad, ang pagpananom o mga kahoy kilid sa mga sapa ug hustong paghipos sa basura ingon man mga river cleanup drives sa Butuanon River sa Barangay Umapad, Mahiga Creek sa Subangdaku nga ang bukana naa sa utlanan sa Cebu City. —Sanden J. Anadia, Romeo Limpangog (BANATNEWS)
- Latest
