Lalaki gigapos, gituok
CEBU, Philippines — Usa ka wala mailhing lalaki ang napalgang patay ug gituohang biktima sa summary execution diha sa Trans-Central Highway, Sitio Tupas, Barangay Taptap siyudad sa Sugbo kagahapon sa buntag.
Napalgan ang patay’ng lawas sa lalake nga gibinaklid og gapos og straw apil iyang mga tiil ug giputos og puwa nga sako ang ulo niini.
Matud sa hepe sa Police Station 8 Major Alvin Llamedo gatuo sila nga dili taga didto ang biktima tungod kay walay nakaila sa mga residente sa lugar.
“Naay bulsa, gipangkuot tanan, wala gyud, wala’y pitaka, wala tanan, wala’y nakuha sulod sa iyahang short,” ni Llamedo pa.
Nakig-alayon sila sa mga silingan nga lugar sa Barangay Taptap aron pagsuta kun duna sila’y pamilya o kabanay nga na-missing.
Walay nakitang samad pinusilan, dinunggaban o kaha gibunalan ang biktima. Nagtuo sila nga posibleng gituok kini hangtud namatay.
“Maoy duda namo, gituok siguro to ba…kay pagtangtang sa sako gi-move siya nigawas man ang dugo sa ilong murag nalumos bitaw siya,” ni Llamedo pa.
Ang biktima dunay tattoo sa tuo nga bukton niini nga dili maklaro ug gibana-bana sa kapulisan nga nag-edad kini og 40 ngadto sa 50 anyos.
Nagtuo sab ang kapulisan nga ang biktima sa laing lugar gipatay ug gidala lang sa Sitio Tupas ug didto gilabay. — /IBM (BANAT NEWS)
- Latest