Parokyang naigo sa Odette, namatya’g Kura ang pahigayona’g Misa de Gallo ni Palma

CEBU, Philippines — Nakahan-ay na tanang mga schedules ni Archbishop Jose Palma sa Archdiocese of Cebu alang sa iyang siyam ka adlaw nga Misa de Gallo nga iyang iselebrar sa nagkalain-laing mga parokya ubos sa artsidiyosis.

Sa Disyembre 16 anha magmisa si Palma sa Our Lady of Pillar Parish, Sibonga; Disyembre 17- Sto. Tomas De Villanueva Parish, Talaga Argao; Disyembre 18- Sto. Tomas de Villanueva Parish, Matutinao Badian; Disyembre 19- Cebu Metropolitan Cathedral; Disyembre 20- CCTN Holy Family Oratory; Disyembre 21- San Isidro Labrador Parish, Talamban; Disyembre 22- Christ of the Agony, Gethsemane Parish, Casuntingan Mandaue City; Disyembre 23- St. Joseph, Husband of Mary Parish, Tayud Consolacion; Disyembre 24- Carbon Public Market ug sa gabii sa Disyembre 24 anha sa Cebu Metropolitan Cathedral. Ang misa sa arsobispo ipahigayon tulo ka adlaw sa habagatang bahin sa probinsya para sa mga parokya nga  nagrabehan sa pagkuso-kuso sa nilabay nga bagyong Odette.

Samtang ang laing tulo ka adlaw ngadto sa Talamban, Mandaue City ug sa Consolacion sa mga parokya nga adunay mga nitaliwan nga kura.

Kung mahinumduman sa nilabay nga tuig plano unta sa arsobispo ang pagpahigayon sa santos nga misa sa siyam ka mga karaan nga simbahan sa Archdiocese of Cebu subay usab unta sa pagtak-op sa kalihukan sa 500 years of Christianity.

Apan pipila lang ang natigayon human niigo ang bagyong Odette niadtong Disyembre 16, 2021 diin daghang mga lugar ang nangaguba. — /IBM (BANAT NEWS)