CCPO magdoble sa pagbantay batok krimen
CEBU, Philippines — Mas pahugtan pa karon sa Cebu City Police Office ang kampanya batok krimen nunot niining pagsulod na sa buwan sa Disyembre nga sagad modagsa sab sa siyudad ang daghang mga bisita ingon man mga kriminal aron maiktima.
Gibutyag ni Police Col. Ireneo Dalogdog, director sa CCPO nga usa sa ilang gitutokan karon ang mga organized criminal groups o syndicated crimes sama sa tulis, kawat ug uban pa ilabi na nga daghan na og kalihukan nga mahitabo sanglit nagkaduol naman sab ang Pasko ug Bag-ong Tuig.
Una nang gibutyag sa CCPO nga hugot ang ilahang pagbantay sa seguridad sa siyudad sa Sugbo gumikan sab sa mga kalihukan nga gipahigayon sa dakbayan.
Padayon ilang panawagan sa katawhan nga magbinatayon ug dili mokompiyansa.
Usa sa mga dugokan gyud og daghang tawo ang Carbon Public Market sanglit halos ang tanang panginahanglanon sa mga tawo mapalit na diha sa maong merkado.
Ang hepe sa Carbon Police Station 5 Major Kenneth Albotra miasoy ang kapulisan padayon nga mag-coordinate sa nagkadaiyang ahensiya aron matuman ang mandato sa ilaha nga pag-secure sa dapit ug mamentinar ang kahapsay ug kalinaw sa lugar.
“Ang atong kapulisan atong i-maximize ang atong police visibility within the Carbon Public Market ilabi na naa tay Colon Night Market every day, naa tay night market sad diri sa Quezon Boulevard every Fridays, Saturdays and Sundays, we are doing our best to be really present og asa ang convergence,” matud ni Albotra. —/IBM (BANAT NEWS)
- Latest