Cebu City Heritage Charter gitinguha nga umolon

CEBU, Philippines — Ang pag-umol og Cebu City Heritage Charter maoy usa sa mga nag-unang tumong sa gihimo nga 1st Cebu City Heritage Summit diin pormal kini nga gibuksan kagahapon.

Ang nahisgutang kalihokan gipahigayon diha sa usa ka dakong hotel sa Dakbayan sa Sugbo ug gikatakdang matapos usab kini karong adlawa.

Tumong usab sa maong summit nga mahatagan og kahigayonan  ang mga stakeholder sa pagpadayag sa ilang mga concern ug idea sa pagdumala sa lokal nga kabilin isip usa ka importanteng butang sa kalamboan sa siyudad.

"This historical event will firstly be an avenue for us to have a definitive discussion and, in a sense, also a celebration, of what makes us unique as a community, not only as a Sugbuanon but as our shared culture and identity as Subguanong’ Dakbayanon or people of the City of Cebu", matud ni Bise Mayor Raymond Garcia.

Ang mahulma nga Cebu City Heritage Charter magsilbing basehan sa pagpanalipod, pagpreserba ug pag-promote sa  heritage sites ingon man usab sa ilang mga luna ug palibot nga nagtrabaho sa Dakbayan sa Sugbo nga nakakita sa panginahanglan sa pag-atiman niini sa konteksto sa mga paningkamot ug sa pagpalambo sa siyudad alang sa kaayohan sa mga residente niini.

Giingong ang kabilin mahimong magsilbing inspirasyon alang sa socio-economic development.

Ang charter kay usa ka giya alang sa tanang practitioner sa heritage conservation, tanang stakeholders ug bisan kinsa nga nalambigit sa conservation ug pagdumala sa mga heritage places sa siyudad.

Ang unang  heritage summit  sa Dakbayan sa Sugbo adunay tema nga "Harnessing Heritage for Sustainable Development"  ug kaabag sa kagamhanan sa Siyudad sa Sugbo ang nagkadaiyang non-government organizations , lawmakers, professionals, negosyante, church representatives ug uban pa nga stakeholders. —/BDB (BANAT NEWS)