Carbon Police Station temporaryong gibalhin

CEBU, Philippines — Gibalhin una sa laing lokasyon ang Carbon Police Station tungod kay ang daan nila nga opisina gawas nga gubaon na apektado usab kini sa nagpadayon nga modernization project sa Cebu City Government ug Megawide sa Carbon Public Market.  Ang Carbon Police Station diha temporaryong gibalhin sa third floor sa interim building sa Unit II Carbon Public Market.

Si Police Major Kenneth Albotra, hepe sa Carbon Public Market niklaro nga temporaryo lang ang pagbalhin sa ilang buhatan tungod kay padayon pa ang kaugmaran sa bag-o nila nga buhatan diha sa dalan Calderon duol gihapon sa nahisgutang merkado.

Sugod kagahapon kadtong mga adunay tuyo sa Police Station 5 mo deretso na og adto sa third floor sa interim building hinuon ang issuance sa police clearance anaa gibutang diha sa police outpost sa Escaño Street corner ML Quezon, Barangay Ermita, Dakbayan sa Sugbo dapit sa gate sa Cebu Power Corporation.

Nasayran nga ang Police Station 5 dunay 44 ka persons under police custody(PUPC) ug usa ka menor de edad nga na-rescue ug matud ni Albotra nga nipadala sila og request kang Cebu City Police Office Director Ireneo Dalogdog nga kadtong mga PUPC nga nakahimo og heinous crimes adto una ibutang sa custodial facility sa CCPO.

Samtang kadtong mga ginagmay ang kaso ang Cebu City Government adunay gi-provide nga bus ug adto una sila temporaryo nga ipahiluna.

Samtang si Dalogdog nagkanayon nga mas mahimong epektibo ang kapolisan sa paghatag og serbisyo sa katawhan nunot niining maong kalamboan. —/BDB (BANAT NEWS)