Rama tinguha nga hatagan og insentibo ang JO nga mga kawani

CEBU, Philippines — Gianunsyo ni Cebu City Mayor Michael Rama kinsa mao usab ang  presidente sa League of Cities of the Philippines (LCP) nga magpadala siya og suwat kang Presidente Ferdinand Marcos Jr. aron  moisyu kini og  direktiba nga himoong legal ang Christmas incentives sa  tanang  job order (JO)  employees sa tibuok nasud.

Una na nga gimando sa mayor nga ang mga job order nga kawani sa City Hal, pahatagan gyud og Christmas bonus sa dili pa maabot ang Pasko. 

Wala pa hinoun mohatag og tataw nga detalye si Rama kun pila ang kantidad sa maong bonus alang sa JOs sa Dakbayan.

Niadtong Oktubre, una na nga gianunsyo ni Rama nga ang  regular ug casual nga mga  empleyado makadawat  og Christmas bonus nga napanglantawan nga moabot ngadto sa  P17,000 ngadto sa  P20,000.

Ang Kagamhanan sa Dakbayan sa Sugbo adunay  2,200 ka JOs  , 3,433 ka  casual , ug 1,367 ka  regular nga mga empleyado.

Kahinumdoman nga sa niaging tuig, ang Kagamhanan sa Siyudad sa Sugbo pinaagi sa hangyo ni Rama, niapod apod kini og P6,000 nga Christmas bonus ug usa ka sakong bugas  alang sa JOs. —/MEL (BANAT NEWS)