39 ka tawo nasikop sa SACLEO sa CCPO

CEBU, Philippines — _{Niabot ngadto sa 39 ka tawo ang nasikop sa 32 ka anti-illegal drugs operation nga gipahigayon sa Cebu City Police Office.}

Ug nikabat ngadto sa P28.8 milyones nga balor sa ilegal nga drugas nga nitimbang tanan ngadto sa 419.79 gramos ang ilang nakompiska atol sa sa usa ka adlaw nga pag-implementar nila sa Simultaneous Anti-Criminality Law Enforcement Operation (SACLEO)niadtong Martes.

Matud ni Police Lieutenant Colonel Wilbert Parilla, deputy city director for administration saCCPO nga gawas sa anti-illegal drugs operations nihimo usab sila og 41 ka anti-illegal gambling operations diin 72 ka tawo ang nasikop ug P4,556 nga kwarta ang nasakmit.

Samtang sa loose firearms unom ka operasyon ang gihimo ug unom usab ka tawo ang nadakpan ug unom ka armas ang na-recover sa kapolisan.

Niabot usab ngadto sa 41 ang na-served nga warrant of arrest sa CCPO diin 22 ka tawo ang nasikop.

Samtang sa Oplan Katok, sa 6,009 ka operations nga gipahigayon duha ka armas ang gi-surrender.

Nakadakop sila og 157 ka tawo tungod sa paglapas sa nagkalain-laing ordinansa sa kagamhanan sa Siyudad sa Sugbo.

Sa laing bahin, upat ka durugista ang nasikop sa Drug Enforcement Unit (DEU) sa Talisay City Police Station sa ilang gihimong operasyon diha sa nagkalain-laing lugar sa siyudad.

Niadtont Martes hapon nasikop si Rene Gabisan Reales alyas “Ompong Reales”, 38 ug Trany Dico Mabuyo, 34 diha sa Barangay Tanke, ang duha parehong residente usab sa lugar.

Sunod nga nasikop diha sa Barangay San Roque si Julius Jorge Labaya, 26, residente sa Barangay Bulacao, Dakbayan sa Sugbo.

Laing nasikop diha sa Barangay Tanke si Carlo Zabala alyas “Carl”, 22, residente sa Barangay Calamba, Dakbayan sa Sugbo.

Si Police Lieutenant Elwood Ebona nibutyag nga nikabat ngadto sa 26.65 gramos nga shabu nga nikantidad tanan ngadto sa P181,220 ang nakuha nila gikan sa mga suspetsado.

Nunot niini, nasakmit sa kapolisan sa Presinto 5 sa Lapu-Lapu City Police Office ang P748,000 nga kantidad nga shabu laing. 9mm nga kalibre sa pistola gikan sa suspetsadong drug pusher atol sa buy bust operation nga ilang gipahigayon niadtong Martes sa gabii diha sa Barangay Pajo.

Si Police Lieutenant Noah Añana niila sa suspetsado nga si Lyndon Castillo, 22, taga Lawaan, Siyudad sa Carcar.

Laing suspetsadong drug pusher usab ang nadakpan sa buy bust operation sa kapolisan sa Dakbayan sa Bogo.

Ang suspetsado mao si James Paul Tagalog Diamante, 29, taga Barangay Maligon sa maong siyudad,  pumpboy sa gasoline station sa maong dapit.

Nasakmit gikan sa suspetsado ang upat ka paketeng shabu, motorsiklo nga gisakyan niini ug P500 nga buy buy money. —Gabriel C. Bonjoc, Romeo T. Limpangog (BANATNEWS)