2 ka balay nasunog sa siyudad sa Carcar

CEBU, Philippines — Duha ka panimalay ang apektado sa sunog nga niulbo sa may sitio Maximina, Barangay Poblacion 1, Dakbayan sa Carcar, alas 5:22 sa buntag, adlaw nga Miyerkules.

Ang maong sunog naglambigit ug panimay nga ginama sa light materials. Nakontrolar ang maong sunog alas 5:32 ug hingpit nga napawong alas 5:38.

Walay gikataho nga nakalas o naangol sa sunog nga giingong nagsugod sa panimalay nga gipuy-an ni Inocentis Secretaria.

Matud pa sa Ground Commander CINSP Paul Patrick Laude, ang City Fire Marshal sa Carcar City nga usa ka panimalay ang hingpit nga naugdaw, samtang ang usa partial nga nakan-an sa kayo diin gibana-bana nga moabot ngadto sa 70 mil ka pesos ang danyos sa maong sunog.

Gitug-an ni Laude nga imbestigahon pa nila ang hinungdan sa pag-ulbo sa kayo. (BANATNEWS)