P25 mil ang bonus sa mga kawani sa Lapu-Lapu City Hall

CEBU, Philippines — Gipahibalo ni Lapu-Lapu City Mayor Junard "Ahong" Chan nga makadawat og P25, 000 nga bonus ang matag empleyado sa City Hall alang karong tuig 2022.

Suma pa sa mayor nga ang pagpanghatag og bonus sugdan sa ikaduhang semana sa buwan sa Disyembre ug gibase kini sa performance sa matag kawani.

Giklaro ni Mayor Chan nga ang maong bonus madawat sa mga regular nga kawani, mga co-terminus ug mga casual nga empleyado.

Kadtong nagdawat og sweldo nga ubos sa P25, 000 matag buwan modawat gihapon sa maong kantidad.

Apan kon labaw pa sa P25,000 ang gidawat nga suweldo sa matag bulan ang maong kawani  sa City Hall modawat usab og bonus nga susama ang kantidad sa gidawat  niining suweldo sa matag bulan.

Samtang si Chan miingon nga ang mga job order employees sa siyudad ang makadawat usab og salary differential nga mokabat sa P13, 000 karong Disyembre kun nagtrabaho kini gikan sa Enero ngadto sa Disyembre ning tuiga. (BANATNEWS)